Цахим худалдааны дэлгүүр ажиллуулах нэрээр залилан хийж байсан иргэн Ч-г Эрүүгийн цагдаагийн газрынхан илрүүлж, УМБГ-ын Хүнд гэмт хэрэг мөрдөх хэлтэст шалгуулахаар шилжүүлсэн байна. Тэрбээр www.emall.mn, www.mglshop.mn гэх цахим хуудсаар бараа худалдаж, хүргэж өгнө хэмээн иргэдээс мөнгө авч байжээ. Мөрдөн байцаалтын явцад цахим хуудсанд байрлуулсан бараа бүтээгдэхүүнийг худалдан авахыг хүссэн иргэдийн мөнгийг банкны олон улсын дансаар шилжүүлэн авдаг нь тогтоогдсон байна. Мөн хариуцлагаас зугтаах зорилгоор утас, дансны дугаараа өөр хүний нэр дээр бүртгүүлсэн байсан нь ч тогтоогджээ. Тэрбээр 2010 оноос хойш энэхүү хоёр цахим хуудсыг ажиллуулж байсан тул хохирогчдын тоо цөөнгүй байгаа аж. Яг одоогоор хохирсон хүмүүсийн тоо гараагүй, хэргийг үргэлжлүүлэн шалгаж байна.