94 настай Нельсон Манделаг удахгүй эмнэлгээс нь гаргаж гэрт нь хүргэх тухай Өмнөд Африкийн экс ерөнхийлөгч мэдээллээ. Ерөнхийлөгч асан Табо Мбеки Африкийн үндэсний Конгресст өчигдөр дурсамж лекц тавих үедээ энэ мэдээллийг хийсэн байна.

Мандела дээр зочилсон ихэнх албаныхан түүнийг хүнд нөхцөлд байгаа тухай мэдээлж байгаа ч түүний эхнэр болон Ерөнхийлөгч Якоб Зума нар эмчилгээ үр дүнгээ өгч эхэлсэн гэж мэдээлж байна. Тиймээс ноён Табо Мбекийн хэлсэнчлэн гэрлүү нь шилжүүлэх нь түүний биеийн байдал эрс дордсон эсвэл сайжирсантай холбоотой болохыг хэлж мэдэхгүй байгаа аж.

Нельсон Мандела уушигны халдварын улмаас таван долоо хоногийн турш нийслэл Претори хотын эмнэлэгт эмчлүүлж байна. Тэрээр сүүлийн долоо хоногуудад төхөөрөмжийн тусламжаар амьсгалж байгаа юм.

27 жилийг шоронд өнгөрүүлж, 1994 онд Өмнөд Африкийн анхны хар арьст ерөнхийлөгчөөр сонгогдсон Мандела пүрэв гарагт 95 насыг зооглох юм. Табо Мбеки 1999 онд хүртэл түүний дэд ерөнхийлөгчөөр ажиллаж байв.