АНУ-ын Тагнуулын төв газрын ажилтан асан Эдвард Сноуденыг Нобелийн энх тайвны шагналд нэр дэвшүүлжээ. Өдгөө ОХУ-ын Шереметьево нисэх онгоцны буудлаас гарч чадахгүй байгаа түүнийг Шведийн профессор Стефан Сваллфорс нэр дэвшүүлсэн хэмээн Нобелийн шагналын хороо мэдээллээ.

Норвегийн Нобелийн хороонд ирсэн хүсэлтэд профессор Сваллфорс “Эдвард Сноуден баатарлаг чармайлт, хүн чанараараа энэ шагналыг авах эрхтэй. Тэр ганц хүн хүн төрөлхтний төрөлхийн эрх, эрх чөлөөний төлөө тэмцэж чаддагийг харуулж байна” гэсэн байжээ.

Мөн эрдэмтэн 2013 онд Эдвард Сноуденд Нобелийн шагнал олгох нь 2009 онд АНУ-ын Ерөнхийлөгч Барак Обамад яаран олгосноос болж эзнээ олоогүй хэмээх муу нэр зүүх болсон Нобелийн энх тайвны шагналын нэр хүндийг хамгаалах болно гэсэн байна.

Тагнуулын мэдээллийн ажилтан асан Эдвард Сноуден АНУ-ын Үндэсний аюулгүй байдлын агентлагын “Призм” зэрэг хөтөлбөрүүд олон улсын томоохон байгуулллага хийгээд иргэдийн харилцаа холбоог нууцаар тагнадаг тухай баримт, мэдээллийг цацсан юм. АНУ-ын эрх баригчдын шахалтын улмаас Хонконгод нуугдаж байсан тэрээр нууцыг дэлгэснийхээ дараа буюу өнгөрсөн сарын 23-ны өдрөөс хойш Шереметьево нисэх онгоцны буудлаас гарч чадахгүй байгаа юм. 32 настай Сноуден нууцыг дэлгэснээ хүн төрөлхтний аюулгүй байх эрх, шударга ёсны төлөө хэмээн тайлбарласан юм. 21 улсаас орогнол хүссэн тэрээр өчигдөр ОХУ-аас албан ёсоор орогнол хүссэн билээ. Түүнд Латин Америкийн хэд хэнд орнууд орогнох зөвшөөрөл олгосон ч бичиг баримтгүйн улмаас нисэх буудлын дамжин өнгөрөх хэсгээс гарч чадахгүй байгаа юм.