АНУ-ын тагнан турших үйл ажиллагааны тухай нууц мэдээллийг олонд дэлгэсэн Эдвард Сноуден ирэх хэдэн өдөрт Москва хотын Шереметьево нисэх онгоцны буудлыг орхих талаар түүний хуульч өчигдөр албан ёсоор мэдэгдлээ.

Сноуден өнгөрсөн мягмар гарагт ОХУ-д орогнох хүсэлтээ албан ёсоор өгсөн юм. “Сноуден ойрын хэдэн өдөрт онгоцны буудлаас гарах ёстой. Учир нь түүний хууль ёсны хүсэлтийг баталгаажуулах шаардлагатай” хэмээн хуульч Анатоли Кучерена мэдэгдсэн байна.

Мөн ОХУ Сноудены хүсэлтийг албан ёсоор хэлэлцэж байгаагаа батламжлавал тэрээр онгоцны буудлыг хууль ёсоор орхих эрхтэй болох аж.
ОХУ түүнд орогнол олгох эсэх нь тодорхойгүй байна. Тус улсын Ерөнхийлөгч Владимир Путин өмнө нь Сноуденыг Америкийн талд заналхийлсэн үйл ажиллагаагаа зогсооно гэвэл орогнол олгоно хэмээн мэдээлж байсан юм. Харин өчигдөр АНУ, ОХУ-уудын харилцаа тагнуулын ажилтны дуулиант явдлаас илүү чухал хэмээн мэдэгдсэн байна.

Тагнуулын мэдээллийн ажилтан асан Эдвард Сноуден АНУ-ын Үндэсний аюулгүй байдлын агентлагын “Призм” зэрэг хөтөлбөрүүд олон улсын томоохон байгуулллага хийгээд иргэдийн харилцаа холбоог нууцаар тагнадаг тухай баримт, мэдээллийг цацсан юм. АНУ-ын эрх баригчдын шахалтын улмаас Хонконгод нуугдаж байсан тэрээр нууцыг дэлгэснийхээ дараа буюу өнгөрсөн сарын 23-ны өдрөөс хойш Шереметьево нисэх онгоцны буудлаас гарч чадахгүй байгаа юм. 32 настай Сноуден нууцыг дэлгэснээ хүн төрөлхтний аюулгүй байх эрх, шударга ёсны төлөө хэмээн тайлбарласан юм. 21 улсаас орогнол хүссэн тэрээр өчигдөр ОХУ-аас албан ёсоор орогнол хүссэн билээ. Түүнд Латин Америкийн хэд хэнд орнууд орогнох зөвшөөрөл олгосон ч бичиг баримтгүйн улмаас нисэх буудлын дамжин өнгөрөх хэсгээс гарч чадахгүй байгаа юм.