Энэтхэгийн Бихар мужийн Патна хотоос 80 км-т орших Масрах тосгоны сургуулийн хоёр тогооч үдийн хоолоо тарааж эхэлсний дараа ямар нэгэн зүйл буруу болсныг мэдэрчээ. Учир нь хоол идсэнээс хэдхэн цагийн хойно хүүхдүүд бөөлжиж, үхэж эхэлсэн юм. Сургууль дээрээ үдийн хоолонд хордсон 8-11 насны 20 хүүхэд өнгөрсөн даваа гарагт амиа алдсан билээ. Харин одоо энэ тоо 23 болоод байна.

Сурагчид яагаад хоолонд хордсон тухай эмчийн дүгнэлт гарсан нь тус улсад аюулгүй байдлын талаарх маргаантай асуудал өрнүүлээд байна. Мөрдөгчид сургуулийн гал тоогооны өрөөнөөс шавьжны хорны сав олжээ. Гэхдээ сурагчдын хоолонд шавьжны хорыг санаатай болон санаандгүй байдлаар хийсэн эсэхийг маргааш тодорхой болгоно гэсэн байна. Зарим албаны эх сурвалж хоолонд хэрэглэсэн будаанд хор шингэсэн байсан гэжээ.

Харин аюулгүй байдлыг хангаагүй сургуулийн захиргааг эсэргүүцсэн эцэг эхчүүд шавьжны хорноос л хордсон гэдэг байр суурьтай байна.

Одоо эмнэлэгт хордсон 24 сурагч хэвтэж байгаагийн 10 гаруйнх нь биеийн байдал тун муу байгаа гэлээ. Энэтхэгийн олон муж улсад ядуу өрхийн хүүхдүүдэд үнэгүй үдийн хоол олгох хөтөлбөр хэрэгжиж байгаа юм.