Өнгөрсөн долоо хоногт Энэтхэгийн Бихар мужийн Патна хотоос 80 км-т орших Масрах тосгоны сургуулийн 23 сурагч үдийн хоолондоо хордон амиа алдсан. Сургуулийн гал тогооноос шавьжны хорны сав олдсон тул хоолонд хордсон шалтгааныг үүнтэй холбон үзэж байсан юм. Тэгвэл өчигдөр цагдаа нар энэ хэргийн талаар дахин мэдээлэл хийлээ. Сургуулийн хоолонд шавьжны хор орсон нь батлагдсан бөгөөд пестицидийн хэмжээ маш хортой түвшинд байсан хэмээн мэдэгдлээ.

Патна хотын цагдаагийн газрын дарга Равиндра Кумарын мэдээлснээр шүүх эмнэлгийн шинжилгээгээр хортон шавьжийг устгах хор их хэмжээгээр илэрсэн байна. Энэ нь хүний биед маш хортой хэмээх ангилалд багтана гэлээ.

Хортой үдийн хоолонд амиа алдагсад 5-12 насны сурагчид байсан юм. Одоо эмнэлэгт хордсон 24 сурагч хэвтэж байгаагийн 10 гаруйнх нь биеийн байдал тун муу байгаа юм. Хэрэгт холбогдуулан хэн нэгнийг баривчлаагүй байна.
Энэтхэгийн олон муж улсад ядуу өрхийн хүүхдүүдэд үнэгүй үдийн хоол олгох хөтөлбөр хэрэгжиж байгаа юм.