Хуульчийн эрх зүйн байдлын тухай хуульд заасны дагуу Улсын Дээд шүүх 2013 оны 7 дугаар сарын 8-ны өдрөөс өмгөөлөгчийн шүүхэд төлөөлөх эрхийн бүртгэлийг хийж эхэлсэн.

Гэтэл одоогийн байдлаар тун цөөхөн өмгөөлөгч шүүхэд төлөөлөх эрхээ бүртгүүлээд байгаа аж. Иймээс Улсын Дээд шүүхээс Монголын Өмгөөлөгчдийн холбоонд хандаж “Хуульчийн эрх зүйн байдлын тухай хуулийг дагаж мөрдөх журмын тухай хуулийн 5 дугаар зүйлийн 5.1-д “Хуульчийн эрх зүйн байдлын тухай хууль хүчин төгөлдөр болохоос өмнө өмгөөллийн үйл ажиллагаа эрхлэх тусгай зөвшөөрөл авсан иргэн хуульчдын нэгдсэн бүртгэлд бүртгүүлсэн өдрөөс хойш 90 хоногийн дотор өмгөөлөгчийн нэрсийн жагсаалтад бүртгүүлэх бөгөөд өмгөөлөгчийн нэрсийн жагсаалтад бүртгүүлэх хүртэлх хугацаанд түүний өмгөөллийн үйл ажиллагаа эрхлэх тусгай зөвшөөрөл хүчинтэй байна” гэж заасны дагуу хугацаанд нь багтаан өмгөөлөгчдийг дээрх бүртгэлд бүртгүүлэх талаар арга хэмжээ авахыг хүсч албан бичиг хүргүүлсэн. Түүнчлэн дурдсан хугацаанд бүртгүүлээгүй, хугацаа хэтрүүлсэн өмгөөлөгчийн шүүхэд төлөөлөх эрхийг бүртгэхгүй болох үр дагавартай болохыг нийт гишүүн өмгөөлөгчдөдөө мэдэгдэхийг МӨХ-ны Ерөнхийлөгч Д.Батсүхэд албан бичгээр мэдэгдсэн байна.

Хуульчдын нэгдсэн бүртгэлд 2013 оны 5 дугаар сарын 6-ны өдөр эхний өмгөөлөгчид бүртгүүлсэн бөгөөд тэдгээрийн шүүхэд төлөөлөх эрхээ бүртгүүлэх 90 хоногийн хугацаа 8 дугаар сарын 6-ны өдрөөр дуусгавар болж байгаа бөгөөд өмгөөлөгчид шүүхэд төлөөлөх эрхийн бүртгэлд яаралтай хамрагдах шаардлагатай байна.