Энэ долоо хоногоос Засгийн газрын гишүүд ажилдаа орох гэж байгаа ч бусад улс төрчдийн хувьд амралт нь дуусаагүй байна. Ялангуяа 90 жилийн ой нь тохиож буй дөрвөн аймгийн уугуул улс төрчид наадам хэсээстэй байна. Улс төрийн халуун үйл явдал намжсан энэ өдрүүдэд улс төрчүүд хаагуур сэрүүцэж явна вэ?

     Амралтгүй ажиллана гэж ам өчигөө өгч байсан Засгийн газрын сайд нар хамгийн удаан хугацаанд амарсан Засгийн газар боллоо гэсэн шүүмжлэлд өртөөд байгаа. Энэ долоо хоногоос Засгийн газрын гишүүд ажилдаа орох гэж байгаа ч бусад улс төрчдийн хувьд амралт нь дуусаагүй байна. Ялангуяа 90 жилийн ой нь тохиож буй дөрвөн аймгийн уугуул улс төрчид наадам хэсээстэй байна. Улс төрийн халуун үйл явдал намжсан энэ өдрүүдэд улс төрчүүд хаагуур сэрүүцэж явна вэ?

Шалгуулж буй Ё.Баатарбилэг наадмын талбайд
    Архангай аймаг 90 жилийн ойгоо сүртэй сайхан тэмдэглэж байна. УИХ-ын гишүүн Р.Гончигдорж, Б.Болор, сайд Н.Батбаяр нар гоёлын дээлээ өмсөж, эхнэр хүүхдээ дагуулан наадмын талбайд  дэрвэж явна.  Мөн УИХ-ын дарга З.Энхболд ч түрүү бөхөд шагнал гардуулж аймгийн найр хэсэж яваа харагдсан. Харин энэ наадамд тэднээс илүү олны анхаарлыг татаж байсан нь засаг дарга асан Ё.Баатарбилэг байв. Түүнийг Цэнхэр сумын алтны уурхайн зөвшөөрлийг гадны компанид өгч хахууль авсан хэргээр шалгуулж байгаа юм. Тиймээс УИХ-ын гишүүдээс илүү хуучин засаг даргаа сонжин харах хүмүүс олон байсан гэнэ.

Хэнтийн хүндтэй зочид Б.Гарамгайбаатар, Д.Арвин
   Тэгвэл Хэнтий аймгаас гаралтай гишүүд мөн л 90 жилийн наадамдаа оролцож байна. УИХ-ын гишүүн Б.Гарамгайбаатар, Д.Арвин нар нутгийнхаа наадмыг үзэнгээ байгалийн сайханд амарч байгаа аж. Тэд наадмын ойн барилдаанд зодоглосон Н.Түвшинбаяр аваргатай хуурч хөөрч суугаа харагдсан.
   Харин мөн л ойн баяраа тэмдэглэж байгаа Төв аймгийн наадамд УИХ-ын гишүүн М.Энхболд, Сү.Батболд, Завханы наадамд О.Содбилэг,  Я.Санжмятав, Д.Оюунхорол нарын гишүүд хүндэт зочин болон очжээ.

МАН-ынхан Ким Чен Уны урилгаар Хойд Солонгост
     Хойд Солонгос руу Ким Чен Уны намын урилгаар явсан МАН-ын удирдлагууд өнөөдөр ирнэ. Тэд Хойд Солонгосын дайн дууссаны 60 жилийн ойг хэрхэн тэмдэглэж буйг харахаар ийнхүү мордсон юм. Дарга нар эзгүй байх хойгуур МАН-ын залуучууд маргааш Бага хурлаа хийнэ гэж байгаа ч хойшлогдох нь тодорхой болоод байна.  Намаа шинэчилнэ гэж залуучуудаа уриалж байгаа Н.Номтойбаяр гишүүн тэдэнтэй хамт явсан тул Бага хурлын талаар тохироо хийгээд ирж магадгүй гэсэн хардлага гараад байгаа юм.

С.Баяр Булганд
    АНУ-аас аль эрт ирсэн ч Улаанбаатарт үзэгдэхгүй байгаа Ерөнхий сайд асан С.Баяр Булганд амарч байна.  Тэрбээр Булган аймгийн Тэшиг суманд байдаг өөрийн амралтын газар биеэ сувилуулж байгаа бололтой.