Хэнтий аймаг энэ жил даншигийн аваргууд болон өвгөн ноён М.Пүрэвжавтаа зориулан сүрлэг сайхан хөшөө босгож 90 жилээ өргөн дэлгэр тэмдэглэж байна. Мөн Дархан аварга Б.Бат-Эрдэнэ тэргүүтэй МАН-ынхан аваргуудынхаа хөшөөг босгоход ихээхэн санаачилга гаргасан бол АН-ынхан 90 жилийн хурдан хүлэгүүдийн эхний бүх байг даажээ.

Харин 90 жилийнх нь ойд нэгэн хүндэт зочин очсон нь олимпийн аварга, Улсын харцага Н.Түвшинбаяр юм. Тэрээр бөхийн ертөнцөд хөтөлж оруулсан аварга багшийгаа хүндэтгэн аймгийнх нь 90 жилийн ойд ирж оролцож байгаа талаараа хүмүүст тайлбар хийжээ. Харин түүнийг нь сонссон Хэнтийн залуус ихэд дургүйцэж “ичээч, жудагтай байгаач, хэн чамайг бөхөд оруулсан бэ” хэмээн орилолдсон сураг гарав. Учир нь өнгөрсөн Ерөнхийлөгчийн сонгуулиар олимпийн аварга Н.Түвшинбаяр их спортод хөтөлсөн аварга багш Б.Бат-Эрдэнийгээ биш өрсөлдөгчийг нь дэмжсэн юм. Тийм учраас Хэнтийн залуус олимпийн аваргад таатай хандаагүй бололтой. Учир нь Н.Түвшинбаяр анх Булган аймгаас Б.Бат-Эрдэнийн “Аварга” дээд сургуульд оюутан болж ирсэн юм. Тэгээд Б.Бат-Эрдэнийн удирдлага дор бөхийн бэлтгэл хийж, үндэсний бөхийн шигшээ багт багтаад алдарших замаа тавьсан гэгддэг. Энэ бүх учрал ерөөл бас өнгөрсөн сонгуулийн гэмээ бодож аварга багшийнхаа аймгийн 90 жилд очсон гэж нэгэн эх сурвалж мэдээлэв. Иймэрхүү уур амьсгалд зодоглосон олимпийн аварга, Улсын харцага Н.Түвшинбаяр тавын даваанд нэгэн аймгийн арсланд өвдөг шорооджээ.

Уг нь өнгөрсөн наадмаар Даян аварга Г.Өсөхбаяр зургаагийн даваанд Н.Түвшинбаярт бууж өгч харцага болгосон юм. Тэгээд дараа нь “Олимпийн дэвжээнд Монгол түмнээ хоёронтоо баясгасан аваргатай барилдах гэхээр сэтгэл хөшөөд чадсангүй. Дэлхийн дэвжээн дээр унаагүй хүнийг Монгол наадмынх нь дэвжээнд унагаад яахав гэж бодлоо. Бүх Монголчуудыг хагартал нь баярлуулж явсан залууг Монгол наадамдаа өндөр цолтой, сайхан барилдаг гээд тахимаа өгчихлөө” хэмээн тайлбарласан юм. Улсын Даян аварга хүн ингэж бодоод бууж өгч байхад хөдөөгийн аймгийн арслан бариа зөрөөн дээр л олимпийн аваргыг өвдөглүүлчихжээ. 

Олимпийн аварга Н.Түвшинбаяр өнгөрсөн улсын наадмын гурвын даваанд Улсын харцага Г.Ганхуягийг, дөрвийн даваанд Улсын заан М.Өсөхбаярыг, тавын даваанд Улсын заан Д.Рагчааг, зургаагийн даваанд Даян аварга Г.Өсөхбаяраар давж Улсын харцага болсон юм. Харамсалтай нь тэрээр наадмын дараах анхны барилдаан буюу Хэнтий аймгийн 90 жилийн ойд очиж ийнхүү тавын даваанд өвдөг шороодлоо. Сонирхолтой нь Дархан аварга Б.Бат-Эрдэнэ тавын таваанд унасан олимпийн аварга, Улсын харцага Н.Түвшинбаярыгаа “анзааргагүй барилдлаа, том цолтой бөхөд жижиг наадам халгаатай байдаг” хэмээн өмөөрсөн сураг гарав.