Венесуэлийн Ерөнхийлөгч Николас Мадуро Кубын экс удирдагч Фидель Кастротой уулзжээ. Удирдагчдын Гаванад уулзсан зургуудыг Кубын хэвлэлүүд өчигдөр олноор нийтэлсэн байна.

Хэвлэлүүдийн мэдээлснээр Ерөнхийлөгч Николас Мадуро өнгөрсөн пүрэв гарагт Кубын хувьсгалын 60 жилийн ойн баярыг тохиолдуулан тус улсад айлчилжээ. Харин экс удирдагч Фидель Кастро ойн баярын арга хэмжээнд оролцоогүй бөгөөд Николас Мадуро болон түүний дүү Ерөнхийлөгч Раул Кастро л үйл ажиллагаанд оролцсон байна.

2006 онд албан тушаалаа өгсөн Фидель Кастро нарийн гэдэсний хүнд өвчин туссан бөгөөд сүүлийн жилүүдэд олны өмнө тун ховор гарсан юм.

Кубын Засгийн газрын сайтын мэдээлснээр Николас Мадуро Фидель Кастрод Венесуэлийн тэргүүн агсан Уго Чавес зурсан уран зургийг бэлэглэсэн гэжээ. Харин Кастро хариу болгон Мадурод нэгэн захидал өгсөн байна. Энэхүү захидалд хоёр долоо хоногийн өмнө Хойд Солонгосын хөлөг онгоцноос Кубын зэвсгүүд олдсон явдлыг тус улсын хувьсгалт эрх чөлөө, нэр хүндийг унагаах оролдлого хэмээн тайлбарласан байжээ.

Хувьсгалын 60 жилийн ойн баярт хүрэлцэн ирсэн удирдагчид өгсөн энэхүү захидлыг Кубын “Juventud Rebelde” сонин бүрэн эхээр нь нийтэлсэн байна. Хэдхэн хоногийн өмнө Панамын тэнгисийн цэрэг Хойд Солонгосын хөлөг онгоц элсэн чихрэн дунд олон тооны зэвсгийг Кубээс тээвэрлэж явсныг илрүүлсэн билээ.