Өнгөрсөн долоо хоногт Испанид гарсан галт тэрэгний аймшигт ослын үед жолооч нь утсаар ярьж байсан талаар шинжээчид мэдээллээ. Мөн энэхүү нотолгоог галт тэргийг эзэмшигч төрийн өмчит төмөр замын компани “Ренфе” ч бататгасан байна. Компанийн удирдлагууд 52 настай жолооч Франкисцо Жөүс Гарзон Амо осол гарах үед компанийн ажилтантай утсаар ярьсан гэжээ.

Шинжээчид галт тэрэгний хар хайрцгийг нарийвчлан шалгаж 79 хүний аминд хүрсэн шалтгааныг тодруулахыг хичээж байгаа юм. Одоогийн байдлаар осол техникийн шалтгаанаас болж гараагүй хэмээн мэдээлээд байна.

Галт тэрэг осолдох үед жолооч хурд хэтрүүлсний улмаас цагт 192 км-ийн хурдтай явжээ. Тухайн үед хурдны дээд хязгаар 80 км байх ёстой байсан юм.

Жолооч Франциско Жөүс Гарзон Амог шүүх эхний сонсгол хурал өнгөрсөн даваа гарагт болсон юм. Тэрээр өөрийгөө болчимгүй алхам хийсэн гэхээс өөр ямар нэгэн мэдэгдэл хийх, хариулт өгөхөөс татгалзсан юм.
 
Гласия мужийн ослоор 79 хүн амиа алдаж, 130 гаруй хүн бэртэж гэмтсэн билээ. Мадридаас Феррол хотыг зорьж явсан галт тэргэнд 218 хүн зорчиж явсан бөгөөд осолдох үед бүх вагонууд нь унасан юм. Энэхүү осол Испанийн түүхэнд байгаагүй хамгийн гамшигт ослоор тодроод байна.

Дараагийн сонсгол хуралдаан хэзээ болох нь тодорхойгүй байна.