Баянзүрх дүүргийн XIII хороололд “Баянхайрхан” компанийн захиалгаар баригдаж буй 12 давхар орон сууцны барилгын өргөгч цамхагнаас үсэрч амиа хорлохоор завдсан Н.Цэрэнноров гэгчид хэрэг үүсгэхээр болжээ. Түүнийг амьд явах эрхээ зөрчин, нийгмийг цочролд оруулсан, олон нийтийг буруу зүйлд татсан гэх үндэслэлээр хэрэг үүсгэн шалгахаар болсон байна.

Тэрбээр энэ сарын 3-ны шөнө барилгын өргөгч цамхаг руу авирч, амиа хорлоно хэмээн компаниас 50 сая төгрөг нэхсэн бөгөөд компаниас тэрхүү мөнгийг нь өгсөн учраас тухайн өдрийн 13.00 цагийн үед цамхагаас буусан юм.

Мөн энэ талаар “Баянхайрхан” компанийн гүйцэтгэх захирал, ерөнхий инженерүүд өнөөдөр мэдээлэл хийлээ.

“Амиа хорлоно хэмээн 13 цаг кран дээр суусан залуу ямар нэгэн шалтгаангүйгээр 50 сая төгрөг нэхэмжилсэн. Цалин мөнгийг нь өгөхгүй байсан асуудал байхгүй. Харин бид нар түүний амийг аварч чадлаа. 70 гаруй хүний бүрэлдэхүүнтэй барилгын бригадтай гээд байсан Л.Цэрэнноров 20 гаруй ажилтантай байсан төдийгүй шаардлага тавихаар удахгүй хүнээ нэмнэ гэсэн байна. “Тэрээр нэмж хүн ажиллуулахдаа хүнээс 15 сая төгрөг зээлж ажилчиддаа өгсөн байсан. Тэр мөнгө нь нэхэгдсэн учир биднээс мөнгө нэхэмжилж амиа хорлоно хэмээн сүрдүүлсэн ” хэмээн барилгын компанийн удирдлагууд мэдэгдлээ. Гагцхүү тэдний ийн хэвлэлийн хурал хийсэн нь өөрийн компанийн буруугаас энэ залуу мөнгө нэхэж, амиа хорлоно гэж сүрдүүлээгүй. Бид нэхсэн мөнгийг нь өгсөнөөр хүний амь аварлаа гэдгийг тайлбарлахыг хүсчээ.