Хамгийн хариуцлагатай байх ёстой газруудын нэг дэндүү хариуцлагагүй байдаг нь нотлогдлоо. Тодруулбал, ШШГЕГ-ынхан “хажуудаа” байсан хоригдлыг хянаж чадаагүй байгаа юм. Энэ сарын 2-ны шөнө 21.00-22.00 цагийн хооронд ШШГЕГ-ын ойролцоо Чингэлтэй дүүргийн нутаг дэвсгэрт байрлалтай “Толла” дэлгүүрийн худалдагчийг зэвсэглэсэн этгээдүүд дээрэмдсэн хэрэг гарсан. Үүнтэй холбогдуулан ШШГЕГ-ын аж ахуйд ял эдэлж байгаа ялтныг уг дээрмийн хэргийг үйлдсэн байж болзошгүй хэмээн сэжиглэн шалгаж байгаа. Тэгэхээр эдгээр ялтнууд дэлгүүр дээрэмдсэн нь нотлогдвол харгалзагч, байцаагч нар ямар хяналт муутай байдгийг харуулж байгаа юм.

Дэлгүүрээс эд зүйл юу ч аваагүй зөвхөн 500 мянган төгрөг дээрэмдсэн

Чингэлтэй дүүрэгт байх хүнсний дэлгүүрт хоёр эмэгтэй худалдагчийг байхад маск, саравчтай малгайтай хоёр этгээд орж ирж айлган сүрдүүлж орлогын бэлэн мөнгийг нь дээрэмдсэн. Ингэхдээ 500 орчим мянган төгрөгнөөс өөр эд зүйл аваагүй байгаа юм.  Тэгвэл энэ хэрэгт дээрх хоригдлуудыг холбогдуулан шалгаж байгаа. Эх сурвалжийн мэдээлж буйгаар дэлгүүр дээрэмдсэн этгүүдийг уг хоригдлууд бараг л мөн гэж байгаа. Тиймээс ч цагдаагийн байгууллагаас шалгаж эхэлсэн гэв.

Дэлгүүр дээрэмдсэн хоригдлуудаас гадна хүчингийн хэрэгтэн оргожээ

Хүмүүс дээрх дэлгүүр дээрэмдсэн хэргийн талаар буруу ойлголттой байгаа юм. Учир нь хэвлэл мэдээллийн хэрэгслээр ажил хийж байсан хоригдлууд оргох явцдаа дэлгүүр дээрэмдсэн гэсэн ташаа мэдээлэл гараа; байгаа.  Тэгвэл оргосон нэг л хоригдол, ажил хийж байхдаа дэлгүүр дээрэмдсэн хоёр хоригдол байгаа юм.

Өөрөөр хэлбэл, өнгөрсөн сарын 25-ны өдөр Баянгол дүүргийн 20 дугаар хороо ШШГЕГ-ын харьяа Цагдан хорих 461 дүгээр ангиас хүчингийн гэмт хэрэгт шалгагдаж байсан Говьсүмбэр аймгийн харьяат эрхэлсэн тодорхой ажилгүй сэжигтэн этгээдийг, ШШГЕГ-ын харьяа Цагдан хорих 461 дүгээр ангиас оргосон байгаа юм.  Оргосон ялтныг  УМБГ, ЭЦГ, НЦГ болон ШШГЕГ-ын алба хаагчид эрэн сурвалжлах ажиллагаа явуулснаар тухайн өдөртөө барьсан аж.

Тэгвэл ШШГЕГ-ын гадна ажил хийж байсан хоригдлуудын хувьд оргож зугтаагүй, харин ажил хийж байх явцдаа дэлгүүр дээрэмдсэн байх магадлалтай юм.

УМБГ-аас ШШГЕГ-т мэдэгдэл хүргэсэн

Эрүүгийн байцаан шийтгэх хуулийн 190.1 дүгээр зүйлд "Гэмт хэрэг гарахад нөлөөлсөн шалтгаан нөхцлийг тогтоомогц хэрэг бүртгэгч, мөрдөн байцаагч, прокурор нь зохих хуулийн этгээдэд тэрхүү шалтгаан нөхцлийг арилгах арга хэмжээ авахуулахаар мэдэгдэл бичиж хуулбарыг хавтаст хэрэгт хавсаргана" гэж заасны дагуу өчигдөр УМБГ-аас ШШГЕГ-т мэдэгдэл хүргүүллээ.

Учир нь УМБГ-аас гэмт үйлдэл гарах шалтгаан нь телекамераар тавих хяналт хангалтгүй, ангийн дотоод зохион байгуулалт, харуул хамгаалалтын ажилтнуудын тавих хяналт сул, хангалтгүй байсан гэж үзэж байгаа юм. Эдгээр нь уг гэмт хэрэг гарахад нөлөөлсөн учир дээрх шалтгаан нөхцлийг арилгах, дахин гэмт хэрэг үйлдэгдэхээс урьдчилан сэргийлэх, зөрчлийг арилгуулах тухай албан мэдэгдлийг ШШГЕГ-т хүргүүлсэн юм.

ШШГЕГ: Хоригдлууд дэлгүүр дээрэмдсэн нь эцэслэн тогтоогдоогүй

Харин ШШГЕГ-аас  "2013 оны 8 дугаар сарын 2-ны шөнө 21-22 цагийн хооронд ШШГЕГ-ын ойролцоо Чингэлтэй дүүргийн нутаг дэвсгэрт байрлалтай “Толла” дэлгүүрийн худалдагчийг зэвсэглэсэн этгээдүүд дээрэмдсэн хэрэг гарсан. Үүнтэй холбогдуулан тус ерөнхий газрын аж ахуйд ял эдэлж байгаа ялтныг уг дээрмийн хэргийг үйлдсэн байж болзошгүй хэмээн сэжиглэн ЦЕГ-аас хууль журмын дагуу байцаалт авсан болно. Түүнчлэн энэ хэрэгт ялтан холбоотой нь эцэслэн тогтоогдоогүй бөгөөд зөвхөн мөрдөн байцаалтын ажиллагаа явагдаж байна. Иймд ШШГЕГ-ын харьяа Хорих 441 дүгээр ангиас зэвсэглэсэн хоёр ялтан оргосон гэсэн мэдээлэл огт үндэслэлгүй болохыг хариуцлагатайгаар мэдэгдэж байна" гэв.

Ямартаа ч УМБГ-аас ямар нэг үндэслэлгүй зүйл дээр шалгалтын ажиллагаа явуулахгүй байх. Тэгэхээр хоригдлууд дэлгүүр дээрэмдсэн нь бараг л нотлогдох биз.  Энэ хэрэг ШШГЕГ-ын хяналтын камер, хараа хяналт муу байгааг илчилж, олон нийт шүүмжлэхэд хүргэлээ.