Тагнуулын төв газрын ажилтан асан Эдвард Сноуденд орогнол олгосон Москвагийн шийдвэрийг үл харгалзан АНУ болон ОХУ дээд түвшний хэлэлцээрүүдээ ирэх баасан гарагт хийх болно хэмээн АНУ-ын эрх баригчид мэдээллээ.

Төрийн Департментын мэдээлснээр Төрийн нарийн бичгийн дарга Жон Керри болон Батлан хамгаалахын сайд Чак Хагел нар дээд түвшний хэлэлцээрийг эхлүүлэхээр болсон байна. Төлөөлөгчид Вашингтон хотод ОХУ-тай хоёр талын болон глобал олон асуудлыг хэлэлцэх дотор Сирийн мөргөлдөөн, Ираны цөмийн хөтөлбөрийн асуудлууд голлох байр суурь эзлэх аж.

Мөн хоёр тал Сноудений асуудлыг ч хэлэлцэх болно гэсэн байна.

Харин өчигдөр Ерөнхийлөгч Барак Обама “NBC” телевизийн нэвтрүүлэгт оролцохдоо нэгэн мэдээллийг хийсэн нь анхаарал татаад байна. Тэрээр Москваг Эдвард Сноуденд орогнол олгож хүйтэн дайны сэтгэлгээ гаргасан хэмээн буруутгасан байна. Мөн Ерөнхийлөгч Барак Обама хэлэхдээ “Миний Ерөнхийлөгч В.Путинд хэлэх зүйл бол энэ бол өнгөрсөн явдал. Харин бид ирээдүйн талаар бодолцох хэрэгтэй. Бид одоо байгаагаасаа илүү үр дүнтэй хамтран ажиллах боломжгүй гэсэн ямар ч шалтгаан байхгүй” гэжээ.

АНУ Эдвард Сноуденийг буцааж явуулахыг ОХУ-аас хүссэн ч харгалзан үзэлгүй зөвшөөрөл олгосон юм.