АНУ-ын Тагнуулын төв газрын ажилтан асан Эдвард Сноуденд ОХУ өнгөрсөн долоо хоногт орогнох зөвшөөрөл олгосон билээ. Тэгвэл Сноуден ОХУ-ын Засгийн газарт ажиллаж магадгүй талаар эх сурвалж мэдээллээ.

“Түүнийг парламентад мэргэжилтнээр ажиллуулж магадгүй” хэмээн ОХУ-ын томоохон улс төрч мэдээлсэн байна. ОХУ-ын парламентын Дээд танхим буюу Холбооны зөвлөлийн гишүүн Руслан Гаттаров “Би Сонуденийг парламентад ажилуулах болосжтой эсэхийг судална. Түүнийг иргэдийн хувийн мэдээллийн аюулгүй байдлын чиглэлээр ажиллуулж болох байх” хэмээн хэлсэн байна.

Мөн тэрээр Сноуден ОХУ-ын интернэт компаниудыг нууц мэдээлэлд үл нэвтрүүлдэг программ хангамжтай болоход хамтран ажиллах боломжтойг дурджээ.

Руслан Гаттаров нь ОХУ-д нөлөө бүхий эрхэмд тооцогддог. Тэрээр эрх баригч Нэгдсэн Орос намын гишүүн төдийгүй Дээд танхмын Мэдээллийн бодлогын хороог удирддаг билээ.

Энэ сарын нэгний өдөр Эдвард Сноуденд орогнол олгосонд Цагаан ордон ихээхэн дургүйцсэн билээ. Олон сарын турш онгоцны буудлаас гарч чадахгүй байсан Сноуден АНУ-ын Үндэсний аюулгүй байдлын агентлаг иргэдийн утасны яриаг хэрхэн нууцаар тагнадаг байсан зэрэг мэдээллүүдийг илчилсэн юм.