БНХАУ-ын Шанхай хотын хоёр шүүгч болон өөр нэгэн шүүхийн албан тушаалтанг эрх баригчид Коммунист намаасаа хөөжээ. Дээрх албан тушаалтнууд оройн хоолны үеэрээ биеэ үнэлэгч авч дараа нь зочид буудлын өрөө рүү орж буй бичлэг олон нийтэд цацагдсаны дараа энэ шийдвэр гарчээ.

Ерөнхийлөгч Ши Жинпин болон түүний хамтран зүтгэгчид авлигын асуудалтай ханцуй шамлан тэмцэж байх үед ийм бичлэг олон нийтэд цацагдсан нь шүүх тогтолцоо болоод намын нэр хүндийг ихээр унагаасан хэмээн үзэж байна. 

Хонконгийн “Phoenix” телевиз л гэхэд энэхүү хэрэг явдлыг  “Тэд биеэ үнэлэгчидтэй унтсан. Харин хуулийг хүчирхийлсэн” хэмээн тайлбарлан гаргасан бол “People"s Daily” энэ хэрэг шүүгчдийн нүүр царайг харууллаа хэмээн мэдээлжээ.

Бичлэгийг хийж олон нийтэд цацсан эрэгтэйг Шанхайн Коммунист намын хороо шалгаж эхэлсэн байна. Дээрх мэдээллүүдэд албан тушаалтнуудыг биеэ үнэлэгчдэд мөнгө төлсөн эсэхийг дурдаагүй байна. Харин Коммунист намын хууль ёсоор төрийн дээд албан тушаалтнууд биеэ үнэлэгчид болон авлигын хэрэгт холбогдохыг хатуу хориглодог аж.