Австралийн парламентын сонгуульд эрх баригч Хөдөлмөрийн намаас нэр дэвшигч Кевин Рудд болон сөрөг хүчний Либерал-Үндэсний холбоо намаас  нэр дэвшигч Тони Эбботт нар өчигдөр анхны халз мэтгэлцээнээ хийлээ. Нэр дэвшигчдийн мэтгэлцээнийг орон нутгийн телевизүүд шууд дамжуулан үзүүлжээ. Төлөөлөгчид эдийн засаг болоод цагаачлалын асуудлыг хөндсөн байна.

Ажиглагчид хоёр улс төрчийн дунд халуун өрсөлдөөн болно хэмээн үзэж байсан ч анхын мэтгэлцээн хүлээж байснаас харьцангуй нөхөрсөг болсон гэлээ.

Санал сэтгэгдлээ хэлэх үед Кевин Рудд эдийн засгийн аврах шинэ арга замыг санал болгохоо амласан бол Тони Эбботт “Хэрвээ та шинэ замыг хүсч байгаа бол шинэ Засгийн газрыг сонгох хэрэгтэй” хэмээн уриалжээ. Мөн тэрээр өдөр бүр тус улсад завиар цагаачлан ирж буй хүмүүст зориулсан хангалттай бодлого явуулахгүй байгаад Засгийн газрыг шүүмжлээд, энэхүү явдлыг зогсооно хэмээн хэлсэн байна.
Саяхны судалгаагаар ирэх сарын долооны өдөр болох сонгуульд Тони Эбботт тэргүүлсэн билээ.