ОХУ АНУ-ыг танкны биатлонд оролцохыг урьсан талаар “Huffington post” мэдээллээ. Энэхүү саналыг өнгөрсөн баасан гарагт Вашингтон хотноо болсон  “2+2” уулзалтын үеэр ОХУ-ын төлөөлөлгчид болох Гадаад хэргийн сайд Сергей Лавров, Батлан хамгаалахын сайд Сергей Шойгу нар тавьжээ. Тэдний мэдээлснээр хурлын хамтрагчид болох Төрийн нарийн бичгийн дарга Жон Керри, Батлан хамгаалахын сайд Чак Хагель нар саналыг хүлээн зөвшөөрсөн гэсэн байна.

“2+2” уулзалтаар АНУ болон ОХУ-ууд хоёр талын харилцааг сэргээх зорилготой байсан юм. Тиймээс нөхөрсөг биатлоны санал тавьсан байж болох юм хэмээн шинжээчид үзэж байна.

Сергей Шойгугийн мэдээлснээр нөхөрсөг тэмцээн ирэх жил болох магадлалтай аж. Энэхүү тэмцээнд ОХУ давуу талтай гэж үзэж байгаа юм. Учир нь тус улс танкны биатлоныг хоёр удаа зохион байгуулсан бөгөөд ирэх долоо хоногт ч дахин нэгийг зохион байгуулах аж.

Танкны биатлонд оролцож буй бүх танкууд 20 км-ийн зайд дээд хурдаа авч бай руугаа өөр өөр зай, өнцгөөс бүх төрлөөр бууддаг аж. Энэ үед танкууд гарам, хашаа, жижиг гүүр, өндөр хурдны хэсэг, гүйцэж түрүүлэх хэсэг зэрэг саадуудыг туулдаг байна.

Д.Идэр