Хятадын эрх баригчид 10 гаруй өвөр монгол хүнийг дам яриа тараасан хэрэгт буруутгаж ялласан тухай АНУ дахь Өвөр Монголын Хүний эрхийн мэдээллийн төвөөс мэдээллээ. Өнгөрсөн сард 2008 оны газар хөдлөлтөөр орон гэрээ алдсан Хятадын Сычуан мужийн олон тооны Хан үндэстэнг Өвөрмонголын нутагт суурьшуулна гэсэн яриа гарсан байна.

Өвөр Монголын олон нийтийн аюулгүйн албаны мэдээлснээр 13 иргэнийг дам яриа тараасан хэргээр шүүж захиргааны хариуцлага хүлээлгэжээ. Хятадын эрх баригчид тэмцэгчдийг худал мэдээлэл цацаж, нийгмийн тогтвортой байдлыг алдагдуулахыг оролдсон хэмээн үзжээ.

Энэ мэдээлэл цацагдсанаар нутгийн оршин суугчид онлайнаар эсэргүүцлээ илэрхийлэх нь газар авсан байна. Тухайлбал, шийтгэл хүлээсэн 13 хүний нэг болох Мөнхмандаа гэх залуу “Teng Xun” хэмээх блогтоо “Сычуаны 50 мянган хятадыг Өвөрмонголын зүүн Сонид хошуунд суурьшуулах гэж байна. Тэдэнд зориулж орон гэр хүртэл барьсан байна. Тэнд өдгөө 20 мянга гаруй монгол малчин амьдардаг” хэмээн бичсэн байжээ. Мөн тэрээр 80 мянга гаруй хятадыг Баарин хошуунд, 100 мянга гаруй хятадыг Ар Хорчинд суурьшуулахаар бэлтгэж байна гэж бичсэн байна.


    Хятадын эрх баригчид ийм шийвдэр огт гараагүй тул тэд худал мэдээлэл тараасан буруутай гэж мэдээлж байна.
Гэсэн хэдий ч олон тооны хан үндэстнүүдийг өвөр Монголд суурьшуулах нь үнэн болохыг нотлох зураг, мэдээлэл гарсаар байна. Хятадын “Dong Da Meng Gu Wang” гэгч компани Ордост үерт гэрээ алдсан Сычуаны хан хятадуудад зориулан доорх орон сууцны хорооллыг барьсан байна.


АНУ дахь Өвөр Монголын хүний эрхийн мэдээллийн төв энэхүү явдлыг дээрэнгүй эрх баригчид өвөр монголчуудын газар нутгийг булаах ээлжит арга хэмээн дүгнэж байна. Өмнө нь өвөр монголчуудын газар нутгийг булаах ноцтой оролдлогууд нь олон улсын хэвлэлүүдэр бичигдсэнийг ч энд дурдсан байна. Тухайлбал,

-2011 оны 7-р сард Өвөр Монголын баруун Баарин хошуунд 1000 гаруй малчин орон нутгийн захиргаанд хандан хятадын саятан Сүй гэгч хууль бусаар малын бэлчээрт халдаж буйг зогсоохыг шаардсан байна. Сүй нь бэлчээрээ хамгаалсан малчдыг зодож, бульдозер, тээврийн хэрэгслээр малыг нь дайрч алсан байна.Энэ үйл явдлын үеэр малчин Баатар 18-ний өдөр малаа хариулахаар гараад хятадуудад  зодуулжээ.

-2011 оны 10-р сард Өвөр Монголд малчин Зоригтыг газар нутгаа хамгаалан жагссаны төлөө Хятадын газрын тосны компанийн машин дайрч хөнөөсөн явдал гарсан билээ.

-2013 оны 3-р сард Өвөр Монголын Дөрвөд хошууны малчид 500 километр гаруй газар жагсаж Хөх хотод ирсэн байна. Тэд Хөх хотын галт тэрэгний буудалд цугларч, тэндээсээ Бээжин хот руу явахаар төлөвлөж байсан аж. Харин тэдний энэ үйлдлийг мэдсэн Хятадын цагдаа нар малчдыг тараажээ.

Өвөр Монголын 23 сая хүн амын 20 хувийг монгол угсаатан эзэлж байна. Тэд Хятадын Засгийн газрын зүгээс хөдөө орон нутагт амьдардаг өвөр монголчуудын газрыг булаан авч, зориудаар талхалж байна хэмээн өвөр монголын тэмцэгчид мэдэгдсээр байгаа юм.