Хятадын генералын өсвөр насны хүү бүлэглэн хүчирхийлсэн хэрэгт холбогдсон тухай “Сяньхуа” агентлаг мэдээллээ. Түүнийг шүүх хурал өчигдөр эхэлсэн байна.

БНХАУ-ын эрх баригчид эрх мэдэлтнүүд буюу элитүүдийн нэр хүндийг унагасан энэхүү хэрэгт шүүмжлэлтэй хандаж байгаа бөгөөд шүүх хурал сэтгүүлчдэд хаалттай болжээ.

17 настай хүү Ли Тяньиг өнгөрсөн хоёрдугаар сард Бээжин хотын зочид буудалд буудлын үйлчлэгч эмэгтэйг дөрвөн найзынхаа хамт бүлэглэн хүчирхийлсэн хэрэгт буруутгаж байгаа юм. Ли Тяньи тухайн үед согтуу байсан учраас хэрэг явдлын талаар санахгүй байна хэмээн хэвлэлд мэдээлсэн байна.

Хүүгийн эцэг Ли Шуанцзян нь БНХАУ-ын Ардын чөлөөт армийн нэр хүндтэй генерал аж. Мөн тэрээр армийн Урлагийн академийн хөгжмийн тэнхмийн эрхлэгчийн албыг хашдаг байна. Хүүгийн ээж нь Хятадын алдарт дуучин Мень Жи бөгөөд өчигдрийн шүүх хуралд оролцсон боловч сэтгүүлчдийн асуултад харуилахаас татгалзжээ.

Энэхүү хэрэг нь хүчин эсвэл биеэ үнэлсэн явдал байсан гэдэг асуудалд талууд өөр өөр байр суурьтай оролцож байгаа аж. Хохирогч эмэгтэй Ли Тяньи түүнийг түрүүлж хүчирхийлсний дараа дөрвөн найз нь хүчирхийлсэн хэмээн мэдүүлсэн байна. Мөн түүнийг хүчирхийлсний дараа хүүг өөрт нь 2000 юань өгөөд явсан гэж мэдүүлжээ.

Ли Тяьнигийн хэрэг өнгөрсөн долдугаар сард Циньхуа их сургуулийн хуулийн профессор хэргийн тухай өөрийн блогтоо бичсэнээр олон нийтэд хүрч эхэлжээ.

Генералийн хүүгийн хэрэг Хятадын олон нийтийн сүлжээ сайт “Вэйбо” дээр хамгийн олон удаа уншигдсан хоёр дахь үйл явдал болоод байна.

Ли Тяньи өмнө нь 2011 онд найзынхаа хамтаар жолооны үнэмлэхгүйгээр машин барьж яваад нэгэн хосыг дайрсан хэрэгт холбогдож байжээ. Тэрээр энэ хэргийн улмаас нэг сарын хугацаанд хүүхдийн засан хүмүүжүүлэх төвд хоригдсон байна.