Эрүүл мэндийн яамны Удирдлагын зөвлөлийн хурал өнөөдөр болов. Яамны төрийн нарийн бичгийн дарга А.Эрдэнэтуяа газар, хэлтсийн дарга нар таван асуудлыг хэлэлцэж, шийдвэрт тусгагдах санал зөвлөмжүүдийг гаргасан байна. Энэхүү Удирдах зөвлөлийн хурлын хүрээнд:

1. Эрүүл мэндийн чиглэлээр мэргэжлийн үйл ажиллагаа эрхлэх тусгай зөвшөөрлийн бодлого, зохицуулалтын тухай

2. Нийслэлд үйл ажиллагаа явуулж байгаа эм, эмнэлгийн хэрэгсэл ханган нийлүүлэх байгууллагын үйл ажиллагаанд хийсэн хяналт, үнэлгээний дүн

3. “Сэргээн засах тусламж үйлчилгээг хөгжүүлэх стратеги”-ийн дунд хугацааны үнэлгээний дүн

4. “1111” төвд ирсэн саналын дагуу нийслэлийн өрхийн эмнэлгүүдийн эмч нарын ажлын цаг ашиглалтад хийсэн үнэлгээний дүн

5. Эрүүл мэндийн яамны Удирдлагын зөвлөлийн хурлын шийдвэрийн хэрэгжилтэд явцын хяналт хийсэн танилцуулга гэсэн асуудлыг хэлэлцлэв.

Эрүүл мэндийн чиглэлээр мэргэжлийн үйл ажиллагаа эрхлэх тусгай зөвшөөрлийн асуудлын дагуу удирдлагуудын зүгээс санал зөвлөмжүүдийг өглөө. Д.Отгонбаатар дарга “Өнөөдөр 1207 эмийн сан ажиллаж байна. Бараг дэлгүүртэйгээ ижилхэн болчихсон байгаа нь асуудал болоод байна” гээд эдгээр байгууллагуудыг тусгай зөвшөөрлөөр нь зохицуулах боломж байгаа эсэхийг асуудал хариуцсан ажлын хэсгээс тодруулсан юм. Эрүүл мэндийн чиглэлээр мэргэжлийн үйл ажиллагаа эрхлэх тусгай зөвшөөрлийг олгодог механизмыг нь цэгцэлж, өөрчлөлт оруулах, түүнчлэн холбогдох хуулиндаа өөрчлөлт оруулж асуудлыг шийдэх хэрэгтэй гэсэн саналууд удирдах зөвлөлөөс түлхүү орж ирлээ.

Мөн Сэргээн засах тусламж үйлчилгээг хөгжүүлэх асуудлыг авч хэлэлцсэн. Төрийн нарийн бичгийн дарга А.Эрдэнэтуяа хэлэхдээ Сэргээн Засах Үндэсний Төвийг бодлогоор дэмжинэ. Үүний сацуу эмнэлгүүдийн сэргээн засах тусламж үйлчилгээний тасаг, гэмтлийн эмнэлгийн тусламж үйлчилгээний асуудлыг орхигдуулж болохгүй гэдгийг онцлов. Түүнчлэн удирдах зөвлөлөөс гаргасан саналуудыг шийдвэрийн төсөлд нэмж оруулах тухай Бодлогын хэрэгжилтийг зохицуулах газрын дарга Д.Мөнхбатад үүрэг болгоод шийдвэрийн төслийг баталлаа.

Эм ханган нийлүүлэх байгууллагын хяналт, үнэлгээний тухай хэлэлцлээ. ЭМЯ-ны Төрийн захиргааны удирдлагын газрын дарга Д.Оюунчимэг хэлэхдээ мэргэжлийн бус удирдлагатай, ашиг сонирхол харсан байгууллагууд байгаа зэрэг нь эмийн асуудлыг бизнес болгох нөхцөл болж болзошгүй, мөн энэ салбарыг зөвхөн худалдааны байгууллага мэт болгож байна гэлээ. Тэд эм, түүнтэй холбоотой асуудал нь бизнес байх учиргүй гэдгийг хэлцгээж байлаа.

Хурлын төгсгөлд “1111” төвд ирсэн саналын дагуу нийслэлийн өрхийн эмнэлгүүдийн эмч нарын ажлын цаг ашиглалтад хийсэн үнэлгээний дүнг танилцуулав. Тус төвийн утсанд өрхийн эрүүл мэндийн төвүүдийн эмч нарын цаг ашиглалт муу байна гэсэн гомдол хамгийн их ирсэн байна. Төрийн нарийн бичгийн дарга А.Эрдэнэтуяа тус үнэлгээний дүнг нэлээн бодьтой, сайн дүн гарсныг дурьдаад энэхүү бодит дүгнэлтүүдийг холбогдох байгууллагуудад цаг алдалгүй танилцуулж байх ёстойг сануулав. Цаашид хариуцлага, хяналтыг сайжруулах бусад асуудлуудыг есөн сард багтаан шийдвэрлэхээр боллоо хэмээн ЭМЯ-аас мэдээллээ.