Нэгэн цагт Хойд Солонгосын удирдагч Ким Чен Уны дурлалт бүсгүй хэмээн нэрлэгдэж байсан поп од Хён Сон Волыг завхай явдлыг дэлгэрүүлсэн кино, бичлэг хийсэн хэргээр олны өмнө цаазалжээ. Түүнийг мөн хэрэгт бууруутгасан 11 нөхдийн хамт энэ сарын 17-ны өдөр баривчилсан бөгөөд өнгөрсөн пүрэв гарагт олны өмнө цаазаар авсан байна.

Цаазлуулах шийтгэл хүлээсэн иргэдийн дунд Хён Сон Волын симфони найрал хөгжмийн хамтлагийн гишүүд мөн багтсан байна.

Тэднийг автомат буугаар гэр бүл болон бусад хүмүүсийн нүдэнд дээр буудан хөнөөсөн хэмээн “Чосун Илбо” сонин бичжээ.

Ким Чен Ун, Хён Сон Вол нар арваад жилийн өмнө дурлалт хосууд байжээ. Тэднийг их удирдагч агсан Ким Чен Ир хүчээр салгасан хэмээн хэвлэлүүд бичиж байсан юм. Хён Сон Вол цэрэг залуутай гэрлэсэн боловч хожим нь Ким Чен Унтай дурлалын холбоогоо үргэлжлүүлсэн гэх мэдээлэл ч гарч байсан байна.

Хойд Солонгосын тэргүүн хатагтай буюу Ким Чен Уны эхнэр Ри Сол Жу ч мөн Хён Сон Волын симфони найрал хөгжмийн хамтлагийн гишүүн байсан юм. Гэхдээ түүнийг цаазаар авах шийтгэл болон эл хэргийг илчлэхэд нөлөөлсөн эсэх тухай мэдээлэл байхгүй байна.

Хён Сон Волын хамтлагийн 2005 онд гаргасан "A Girl In The Saddle Of A Steed" дуу тухайн үед хит болж байжээ.