ШӨХТГ-ын дарга О.Магнай маргааш дуулиант таксиныхаа асуудлаар хэвлэлийн бага хурал хийх гэж байна. Тэрээр өнгөрсөн долоо хоногт такси эхний нэг км нь 1500, хоёрдахь км-ээсээ эхлээд 1000 төгрөгөөр тооцох талаар байр сууриа илэрхийлж ихээхэн эсэргүүцэлтэй тулгарсан. Өнгөрсөн хэд хоног О.Магнайгийн утас дуудлага, мессеж хоёрт дарагдсан байна. ШӨХТГ ч ард түмний гомдол бухимдал бөөн бөөнөөрөө иржээ. Тиймээс О.Магнай дараагийн алхмаа зарлах гэж байна.

Эх сурвалжийн тайлбарлаж байгаагаар бол таксины талаарх одоогийн нөхцөл байдлыг сайн тайлбарлах аж. Тэгээд энэ бүхэн таксины үнэ нэмэгдэх шалтгаан болж байгааг ард түмэндээ дахин нэг учирлах бололтой. Мөн таксины үнэ нэмэгдэх талаар байр сууриа илэрхийлснээс болоод ямар хэмжээний гомдол бухимдал ирээд байгааг нууж хаалгүй тайлагнах гэнэ.

Тиймээс О.Магнайгийн таксины үнэ нэмэх байр суурь өнгөрч буй долоо хоногийн сюрприз байсан. Маргаашийн хэвлэлийн бага хурал ч шинэ долоо хоногийн ард түмний ярианы хачир байх нь гарцаагүй боллоо.

Ямар ч гэсэн тэрээр хувиараа такси үйлчилгээнд явдаг иргэдийг явуулахгүй гэдэг байр сууриа хатуу хамгаалж байгаа гэнэ. Хэрэв иргэд хувиараа халтуур хийх хүсэлтэй бол таксины тусгай зөвшөөрөлтэй 16 компанийн аль нэгэнд нь заавал бүртгүүлэхийг шаардаад зогсохгүй ажил хэрэг болгоно гэж зорьсон үзэл бодлоо хамгаалах аж. Цаашид шийдвэр гарсны дараа иргэд хувиараа такси үйлчилгээ үзүүлбэл хууль зөрчсөн үйлдэл гэж үзэх гэнэ.

Хамгийн сонирхолтой нь ШӨХТГ аливаа бараа, бүтээгдэхүүн үйлчилгээний үнийг нэмэх эрх зүйн үндэсгүй. Харин үнийг хязгаарлаж хянаж байдаг. Ийм газрын дарга яахаараа таксины үнийг нэмэх гэж зориглоод байна вэ гэдэг цааш цаашдаа их хардлагыг дагуулж мэдэх юм.

Одоогийн байдлаар том оврын троллейбус үнэгүй яваад байгаа. Харин том оврын автобус үнэгүй яв гэж шаардвал О.Магнай дарга ажлаа өгнө гэдэгээ мэдэгдлээ. Энэ талаараа “Миний энд байгаа нь ард  түмэнд хэрэгтэй байгаа юм болов уу, надаас өөр энэ ажлыг хийх хүн байхгүй болохоор өөрийгөө энд сууж байгаа гэж ойлгож байгаа. Тэрнээс бүгдийг нь үнэгүй болго гэвэл өнөөдөр ч гэсэн би энэ ажлаас явахад бэлэн байна. Өнөөдөр сайхан санагдаж байгаа зүйл маргааш сайхан байдаггүй л байхгүй юу. Бүх хүнд таалагдаж буй шийдвэр өөрөө зөв байдаггүй. Гашуун боловч үнэн үг” хэмээн тайлбарлав.

Олон түмний дунд овоо нэр хүндийг олоод байсан О.Магнай таксины үнийг нэмнэ гэж мэдэгдсэнээсээ болоод ард түмний дайсан мэтээр нэрлэгдэж эхэлсэн. Энэ хандлагын талаараа “Би алга ташуулах дуртай хүн биш шүү дээ” хэмээн үзэл бодлоо илэрхийлэв. Ийнхүү тэрээр ард түмний сээргүүцэлтэй тулгарч байгаа ч өөрийгөө “алга ташуулах дуртай хүн биш” хэмээн тодорхойлж байр сууриа хамгаалах бололтой.