Францын Засгийн газар Сирийн Ерөнхийлөгч Башар Ал Ассад иргэдийнхээ эсрэг химийн зэвсэг хэрэглэснийг нотлох няцаагдашгүй шинэ нотолгоог олсон хэмээн мэдээллээ. Хэдхэн цагийн өмнө хийсэн эрх баригчдын мэдээллийн дагуу Францын тагнуулын ажилтнууд энэхүү нотолгоог олсон байна.

Нууцын зэрэглэлээс гарч буй есөн хуудас бүхий нотолгоог тус улсын Засгийн газар өчигдөр орой илчилсэн байна. Мөн энэхүү нотолгоо нь АНУ-ын Төрийн нарийн бичгийн дарга Жон Керригийн буруутгалтай тохирч байгааг ч онцолжээ.

Башар Ал Ассадын эсрэг хавтаст хэргийг Францын Ерөнхий сайд Жан Марк Эро сайдуудыг яаралтай хуралдуулснаас хойш хоёр цагийн дараа илчилсэн байна.

Баримт нотолгоонд Сирийн Засгийн газар сэтгэцэд нөлөөлөх сарин хэмээн бодисыг агуулсан үхлийн хөнөөлтэй химийн зэвсгийг ашиглан 1500 хүнийг амиа алдахад хүргэсэн гэжээ. Мөн НҮБ-ын шинжээчдийг ирэхээс өмнө нотлох баримтуудыг устгахын тулд химийн зэвсэг ашигласан хотод агаарын дайралт олныг хийж, бөмбөг дэлбэлсэн гэсэн байна. “Эдгээр үйл явдлууд нь Башар Ал Ассадын нотлох баримтыг устгах гэсэн гарцаагүй оролдлого” хэмээн тайланд тэмдэглэжээ. Мөн “Бид Сирийн сөрөг хүчин ийм өргөн хүрээний химийн зэвсэг тээвэрлэх хүчин чадалтай гэж бодохгүй байна” гэжээ.

Сайдуудын хурлын дараа Ерөнхий сайд Жан Марк Эро Сирид хариу цохилт өгөхгүй өнгөрч болохгүйг онцолжээ.
Францын Ерөнхийлөгч Франсуа Олланд өнгөрсөн сарын 21-ний өдөр Дамаск хотод химийн зэвсэг хэрэглэсний хариуд Сирид цэрэг оруулах ёстой хэмээн үзэж буй АНУ-ын гол дэмжигчдийн нэг юм.