Хэдхэн хоногийн өмнө Японы “Фукушима Дайчи” атомын цахилгаан станцаас цацраг идэвхит бодис алдагдсан тухай мэдээлэл дэлхий нийтийн анхаарлыг татсан. Тэгвэл тус улсын эрх баригчид энэхүү цацраг идэвхит бодис бүхий усны тархалтыг зогсоох мөсөн хана барина хэмээн мэдээллээ.

Засгийн газрын төлөөлөгч Ёшихиде Сугагийн мэдээлснээр мөсөн хана барих ажилд 47 тэрбум иен буюу 473 сая ам.долларын хөрөнгө оруулах аж.

Эрх баригчдын төлөвлөгөөний дагуу хөлдөөсөн гадарга бүхий ханыг риакторуудыг тойруулан барих юм байна. Харин энэхүү хана нь хөргөлтийн шингэнээр дүүрсэн хоолойнуудаас бүтэх аж. Ингэснээр гадаргын ус руу цацраг идэвхит бодис бүхий усыг шавхуурагдахаас сэргийлнэ хэмээн үзэж байна.

2011 онд болсон цунамийн үеэр “Фукушима Дайчи” атомын цахилгаан станцын цөмийн реакторуудад гэмтэл гарснаас болж дэлбэрэх аюул нүүрлэсэн байна. Гамшигт риакторуудын хөргөлтийн систем гэмтсэнээр гурван риактор хайлахад хүрсэн байна. Тиймээс риакторуудыг хөргөөхийн тулд усыг шахуургадаж гаргаж эхэлсэн бөгөөд шавхуурагдсан устай хамт их хэмжээний цацраг идэвхит бодис гадагшилж байсныг мэргэжилтнүүд нотлоод байгаа юм.

Үйлдвэрийг хариуцсан “Тепко” компанийн мэдээлснээр “Фукушима” станцын доорх хонгилоор дамжин өдөрт 400 тонн бохирдсон ус далай руу гадагшилж байжээ. Харин өнгөрсөн сард өндөр хэмжээний цацраг идэвхит бодис агуулсан 300 тонн ус алдагдсан нь ихээхэн шуугиан дэгдээсэн юм.

Олон улсын стандартын дагуу бол цацраг идэвхит бодисын аюулын түвшинг 0-7 хүртлэх үзүүлэлтээр тодорхойлдог бөгөөд “Фукушима”-гийн бохирдлыг хэмжээг гуравдугаар түвшинд хүрсэн хэмээн зарлаад байгаа билээ.

Мөсөн хана барих ажилд их хэмжээний хөрөнгө оруулах Засгийн газрын амлалтыг олон улс нэгэн үйл явдалтай холбон тайлбарлаж байна. Энэ нь Олон улсын Олимпийн хороо 2020 оны зуны Олимпийн наадмыг зохион байгуулах улсыг зарлахаас хэдхэн өдрийн өмнө гаргасан шийдвэр хэмээн олон улсын ажиглагдчид бичжээ. Токио хот нь 2020 оны олимпийг зохион байгуулахад нэр дэвшсэн төлөөлөлгчдийн нэг юм.