Хятадын төв хэсгийн Хубэй мужийн химийн үйлдвэр Фу голыг бохирдуулсны улмаас загас олон мянгаар үхсэн байна. Голын усанд хөвөх үхсэн загаснуудын цуваа 35 км-т хүрчээ. Үхсэн загаснуудыг голоос шүүж авахад нийтдээ 110 тонн хэмжээнд хүрсэн байна.

Байгаль хамгаалах ажилтнуудын мэдээлж буйгаар Фу голоос авсан шинжилгээгээр голын усан дахь аммонийн спиртийн хэмжээ асар өндөр түвшинд хүрсэн байжээ. Энэхүү химийн бодис нь Хубэй мужийн “Shuanghuan” шинжлэх ухаан, технологийн компани эзэмшдэг химийн үйлдвэрээс гарсан хэмээн үзэж байгаа юм.

Албаныхны мэдээлж буйгаар усан дахь аммонийн спиртийн хэмжээ литр тутамд 196 милиграм байсан байна. Дэлхийн Эрүүл мэндийн байгууллагын тэмдэглэснээр гадаргын усанд литр тутамд 12 милиграм аммонийн спирт байх нь хэвийн хэмжээнд тооцогддог байна. Тиймээс бохирдлын хэмжээг асар өндөр түвшинд хүрсэн хэмээн дүгнэж байна.

Одоогоор үйлдвэрийн эрх баригчид байгаль хамгаалагчдын мэдэгдэлд хариу өгөөгүй байна. Байгаль хамгаалагчид үйлдвэрийн үйл ажиллагааг шалгаж өгөхийг холбогдох албаныханд хүсчээ.

“Shuanghuan” үйлдвэр нь шил үйлдвэрлэхэд ашигладаг содын карбонат болон бордоонд ашигладаг ионы хлоридыг үйлдвэрлэдэг байна. Оршин суугчид тус үйлдвэрийг байгаль орчныг бохирдуулж байна хэмээн 2008 оноос хойш дөрвөн удаа томоохон гомдол гаргаж байжээ.