Сирийн асуудал хурцадсанаар биологийн зэвсэг ашинлах явдал хөрш зэргэлдээ орнуудад нөлөөлөх вий гэсэн айдсыг төрүүлээд байгаа талаар эх сурвалж мэдээллээ.

Өнгөрсөн сарын 21-ний өдөр Сири улсыг химийн зэвсэг ашигласан хэмээн үзэж байгаа билээ. Хэрвээ олон улсын хамтрал хориотой зэвсэг ашигласан Башар Ал Ассадад хариу цохилт өгөхөөр Сирид цэрэг оруулбал тэрээр эсэргүүцэн байлдах нь ойлгомжтой юм. Тиймээс энэ үед хамгийн амархан тархаж олон хүний амийг хөнөөдөг биологийн зэвсгийг хэрэглэх магадлалтай хэмээн үзжээ.

Сирийн эрх баригчид биологийн зэвсгийн судалгааг 30 жил нууцаар хийсэн хэмээн үзэж байна. АНУ-ын албаныхны мэдээлснээр Сирийн биологийн зэвсгийн хөтөлбөр 1980 оноос хойш хэрэгжсэн аж. Биологийн зэвсгийн хөтөлбөр нь хөнөөлт бактери, вирус зэргийг их хэмжээгээр цуглуулж орчин үеийн технологиор эдгээр найрлагыг үхлийн нунтаг болгон хувиргадаг хэмээн АНУ болон Дундад Дорнын зэвсгийн мэргэжилтнүүд бичжээ.

“Бид хүний сэтгэц мэдрэлийг хордуулдаг саринд санаа зовж байгаа. Гэхдээ Сирид биологийн зэвсэг байгаа. Тэдгээртэй харьцуулахад сарин хажууд нь юу ч биш” нэрээ нууцалсан хөрш орны төлөөлөгч хэлжээ.

Түүхэн судалгаагаар багадаа зургаан орон биологийн зэвсгийг үйлдвэрлэж байжээ. Үүнд АНУ, Их Британи, ОХУ ордог байна. Гэхдээ дээрх улсуудад биологийн зэвсгийн хөтөлбөрийг хориглоод удаж байгаа гэлээ.