ОХУ-ын Ерөнхийлөгч Вламдимир Путин, АНУ-ын Ерөнхийлөгч Барак Обама нар өчигдөр Петербург хотноо эхэлсэн “Их 20” уулзалтын үеэр гар барилаа. Олон асуудалд сөрөг байр суурьтай байгаа томоохон гүрнүүдийн удирдагчид өнгөрсөн зургаадугаар сард Их Британид болсон “Их 8” уулзалтаас хойш анх удаа гар барьж байгаа нь энэ юм.

Энэ удаагийн уулзалтыг удирдаж буй В.Путин улс орнуудын тэргүүнүүдийг угтан хүлээж авсан юм. Ажиглагчид В.Путиныг АНУ-ын Ерөнхийлөгчтэй гар барихдаа бусад орны удирдагчдаас удаан байсан тухай мэдээлсэн байна.

ОХУ АНУ-ын тагнуулын нууц мэдээллийг илчилсэн Эдвард Сноуденд орогнол олгосноос эхлээд хоёр орны харилцаа хурцдаж эхэлсэн билээ. Түүнээс гадна химийн зэвсэг хэрэглэн 1400 гаруй хүний амийг хөнөөсөн Сирийн Ерөнхийлөгч Башар Ал Ассадад хариуцлага тооцон Сирид цэрэг оруулах асуудал дээр хоёр орон эсрэг байр суурьтай байгаа юм.

“Их 20” уулзалтын гол зорилгуудын нэг нь Сирийн мөргөлдөөнт асуудалд шийдэлд хүрэх явдал юм. Уулзалтын эхний өдөр Германы канцлер Ангела Меркель улсаа Сирид цэрэг оруулахгүй хэмээн мэдэгдсэн юм. Харин Ромын пап дам Францис хурлыг тэргүүлж буй В.Путинд хандан захидал илгээж, Сирид цэргийн хүч хэрэглэхгүй байхыг уриалаад байна.

Д.Идэр