БНХАУ-ын эрх баригчид ӨМӨЗО-ны 52 иргэнийг интернэтээр худал мэдээлэл тарааж, үндэстнийг зөрчилдөөнд оруулахыг оролдсон хэргээр баривчиллаа.

Баривчлагдсан хүмүүсийг үндэстэн хооронд санаатайгаар зөрчилдөөн үүсгэж, олон нийтийг эмх замбараагүй байдалд оруулж, оюутнуудыг ажил хаяж, жагсаал зохион байгуулахыг уриалсан хэмээн буруутгасан гэж Өвөр Монголын Хүний эрхийн мэдээллийн төв бичжээ.

Эрх баригчдын мэдээллийн дагуу сэжигтнүүдийг 1200 худал мэдээлэл тараасан хэрэгт буруутгасан байна. Мөн мэдэгдэлд Коммунист намын онлайн харилцааг захирч буй явдлыг эсэргүүцэн үндэстэн даяар ажил хаяхыг зохион байгуулсан хэрэгт голлон буруутгасныг анхааруулсан байна.

52 хүний 21-д нь захиргааны хариуцлага тооцож 15 өдөр хорихоор болсон байна. Харин арвыг нь торгож, 21-д нь анхааруулга өгсөн аж.

Сүүлийн үед өвөр монголчуудыг онлайнаар худал мэдээлэл тараасан хэрэгт ихээр буруутгах болсон юм. Өнгөрсөн сард л гэхэд 13 хүнийг Сычуань мужийн байгалийн гамшигт өртсөн иргэдийг Өвөр Монголын нутагт суурьшуулна гэсэн худал мэдээлэл тараасан хэргээр баривчилсан билээ.

Коммунист намын нэр хүндийг унагаасан гэх баривчилгааны дараа Германд улсад байрлах Өвөр Монголын хүний эрхийн холбооны захирал Ши Хайминь мэдэгдэл хийсэн байна. Тэрээр “Өвөр монголчууд асуудал үүсгэх гэсэндээ ийм зүйл хийгээгүй. Бэлчээр нутаг бол тэдний олон жилийн турш малаа өсгөж, амьдралаа залгуулж ирсэн гол өв баялаг юм. Хэрвээ Засгийн газар газар нутаг руу дайрах асуудлыг шийдвэрлэхгүй бол олон монголчууд босоход хүрч нөхцөл байдал даамжрах болно” гэжээ.

Өвөр Монголын 23 сая хүн амын 20 хувийг эзлэх өвөр монголчууд болон Хятадын Хан үндэстнүүдийн хооронд зөрчилдөөн гарах нь элбэг байдаг юм. Хан үндэстнүүд Хятадын уул уурхайн компани болон элдэв шалтаг гарган  Өвөр Монголын нутагт ирж малчдын газар нутгийг булаах оролдлогыг байнга хийдэг хэмээн Хүний эрхийн мэдээллийн төв дүгнэжээ.