ОХУ-ын Ерөнхийлөгч Владимир Путин хуучин хэлэлцээрээ сэргээн Иран улсад пуужингийн систем худалдаж, хоёр дахь цөмийн риактор барьж өгөх гэж байна. Энэ талаар Кремлийн нууц эх сурвалж “Huffington post”-д мэдээлжээ.

Энэхүү саналыг Иранийн Ерөнхийлөгч Хассан Роуханид маргааш тавина хэмээн эх сурвалж хэлсэн байна. Хэрвээ Иран улс Путины саналыг зөвшөөрөх юм бол таван ширхэг S-300 пуужингийн системийг 800 сая ам.доллараар худалдан авах аж. S-300 пуужингийн систем нь нисэх онгоц болон залуурт пуужинг буудан унагаах хүчин чадалтай юм байна.

В.Путин Ираны шинэ Ерөнхийлөгч Хассан Роуханитай Киргизстаны нийслэл Бишкек хотод баасан гарагт анх удаа уулзалдахаар тохиролцжээ. Хэлэлцээрт мөн Ираны Бушехр хотод ОХУ хоёр дахь цөмийн риактор барьж өгөх асуудлыг хэлэлцэх юм байна.

Хэрвээ хэлэлцээр батлагдаж, цөмийн риактор барьж эхэлбэл олон улс эсэргүүцэж эхлэх нь ойлгомжтой юм. Учир нь 2010 онд ОХУ Иранд S-300 пуужингийн системийг худалдах гэрээ хийхэд АНУ болон Израйль эсэргүүцэл гаргасны улмаас гэрээг цуцлаж байсан билээ.