Хятадын нэртэй улс төрч Бо Шилайг шүүх эцсийн шатны хурал ирэх амралтын өдөр товлогдож, түүнд оноосон ялыг зарлахаар болсон билээ. Тэгвэл энэ явдлаас өмнө Бо Шилай Хятадын ард түмэнд хандан шоронгоос захидал бичжээ. Энэхүү захидлыг “South China Morning Post” сонин бүрэн эхээр нь нийтэлсэн байна.

64 настай Бо Шилай дэмжигчиддээ хандан бичсэн захидалдаа ямар ч гэм буруугүй хэмээн дахин мэдээллээд өөрт тохиолдсон зүйлүүд нь улс төрийн явуулга бүхий гүтгэлэг хэмээжээ. Мөн тэрээр өөрийгөө хувьсгалын баатар Бо Иебо эцэгтэйгээ адилтган бичсэн байна. Түүний эцгийг эрх  баригчид соёлын хувьсгалын үед шахан хавчиж, олон жилээр шоронд хорьж, олны өмнө гутаан доромжилж байжээ.

Чунцин мужийн намын хорооны дарга асан Бо Шилай захидалдаа шоронгийн хүнд хэцүү байдалтай нүүр тулахад бэлэн байгаа гэжээ. Мөн өөрийнхөө нэр төрийг заавал цэвэрлэнэ гэж тангаргаласан байна.

Тэрээр өмнөх шүүх хурлуудын үеэр өөрийгөө гэм буруугүй хэмээн мэдүүлээд байгаа юм. Түүнийг албан тушаалаа хэтрүүлэн ашигласан, авлига авсан хэргүүдэд буруутган шүүж байгаа билээ.