Өнгөрсөн даваа гарагт АНУ-ын Вашингтон хотын тэнгисийн цэргийн баазад гал нээж 12 хүний амийг хөнөөсөн Аарон Алексисийн ээж видео мэдэгдэл хийжээ. Тэрээр өөрийн царайгаа олон нийтэл харуулахыг хүсээгүй байна. Тэнгисийн цэргээс чөлөөлөгдсөн 34 настай Аарон Алексис цагдаа нартай буудалцах үед амиа алдсан юм.

Хатагтай Кэтлин Алексис хүүгийнх нь халдлагад өртөн амиа алдсан тэнгисийн цэргийн албан хаагчдын гэр бүл, найз нөхдөөс уучлал хүссэн байна. Мөн тэрээр “Би түүнийг яагаад ийм зүйл хийснийг мэдэхгүй байна. Яагаад гэдгийг нь би түүнээс асууж чадахгүй болсон. Гэхдээ хэн нэгэнд аюул учруулж чадахгүй тийм газарт очсонд нь баяртай байна” хэмээн хэлжээ.

Аарон Алексис нь 2007-2011 онд тэнгисийн цэрэгт алба хааж байсан ба сахилга зөрчсөн гэх шалтгаанар халагдсан аж. Түүнийг сэтгэцийн эмнэлэгт эмчлүүлж байсан талаар холбогдох албаныхан мэдээлсэн юм. Гэсэн хэдий ч одоо хүртэл яагаад халдлага үйлдсэнийг тогтоогүй байна.
Ерөнхийлөгч Барак Обама буудалцааны үеэр амь үрэгдсэн тэнгисийн цэргүүдийг хүндэтгэн Цагаан ордны дээр байрлах АНУ-ын төрийн далбааг энэ сарын 20 буюу баасан гараг хүртэл бөхийлгөхийг даалгасан билээ.

Д.Идэр