Ерөнхий сайд Н.Алтанхуяг гадаадад хийсэн анхны айлчлалаараа Японоос 600 сая ам.доллартай тэнцэх иенийн бонд босгохоор болсон. Ажлаа саадгүй амжуулаад ирсэн Засгийн газрын тэргүүн энэ бондыг “Өгөдэй” гэж нэрлэж магадгүй тухай эх сурвалжууд мэдээлж байна. Үүнд зарим иргэд дургүйцэж байгаа бөгөөд гадны оронд өр тавих болгондоо их хаадынхаа нэрийг өгч байгаа нь тохиромжгүй хэрэг гэж үзэж байна. Ямар сайндаа “Дэлхийн хамгийн их өртэй хүнээр Чингис тодорлоо” гэж хошигнож байхав дээ.

   Угаасаа бонд гэдэг бахархаад байх зүйлгүй эд. Бусдаас хүүтэй зээл авч байна гэдэг манай сан, хөмрөгийн “нүцгэн” байдлыг илчлээд байгаа хэрэг. Сангийн сайд эдийн засаг хямраагүй гэж ахин дахин мэдэгдэж байгаа ч лангуун дээрх бараа бүтээгдэхүүний үнэ аль хэдийн “талийж” өглөө.

   УИХ-ын гишүүн Б.Бат-Эрдэнэ эдийн засаг ийм байдалтай болсон нь Шинэчлэлийн Засгийн газрын хэт данхайсан бүтэц, үрэлгэн байдалтай холбоотой гэж үзэж байна. МАН-ын гишүүний үг ч гэлээ төрийн албан хаагчдын тоо өмнөхөөс  олноор нэмэгдсэн нь үнэн. Бас Засгийн газар “Чингис” бондыг мөнгө болж эргэж ирдэггүй зам засвар гэх мэт ажилд ихээр зарцуулж байна. Өөрөөр хэлбэл хүүгээ төлөх мөнгөө хураахгүйгээр, ирээдүйд өр үлдээгээд байгаа тухай эдийн засагчид ярьсаар. Харин УИХ-ын гишүүн Ц.Нямдорж “Би хоёр, гуравдугаар сараас Монголбанкаа кассын хэлбэрээс гаргахгүй бол ханшаа барьж чадахгүй гэж хэлж байсан. Илжигний чихэнд ус хийсэн ч сэгсэрнэ, алт хийсэн ч сэгсэрнэ гэдэг шиг сууж байна” хэмээн бухимдсан юм. Мөн УИХ-ын гишүүн Ж.Энхбаяр “Төсвөөс гадуур Монголбанк гурван их наяд төгрөгийг хэвлээд зах зээл рүү шахчихсан” тухай хэлж байна. Долларын ханш өссөнийг гадаадын хөрөнгө оруулалт муудсантай холбож байсан бол Монголбанкны зах зэл рүү шахсан их хэмжээний мөнгө ханшийг хөөсрүүлсэн гэж Ж.Энхбаяр гишүүн үзэж байна.

  Энэ мэтээр уруудаж буй эдийн засгаа тэжээхийн тулд гадаадаас бонд авсаар байх уу гэдэг асуулт иргэдийн дунд байна. “Чингис” бондын өрөө төлөх байтугай зарцуулж дуусаагүй атлаа дахин өрийн эрэлд манай эрх баригчид мордсоор. Өнгөрсөн 12 дугаар сараас эхлэн хүү нь тооцогдож эхэлсэн “Чингис” бондын нэр дээр жилд 70 орчим сая, 10 жилийн дараа гэхэд нэг тэрбум ам.долларын өрийн бичээстэй байх юм. Ц.Нямдорж гишүүний хэлснээр арай  “Дараа нь Бин Ладен бонд гаргана” гээд арабын орнуудаар айлчлаад, ирээдүйд өр тавиад явж байх юм биш биз, сайд нар аа.