ОХУ-ын хамгийн хүчирхэг эрийг дахин хуримласан гэх мэдээлэл Оросын хэвлэлүүдэд цацагдах боллоо. Ерөнхийлөгч Владимир Путиныг олимпийн наадмын хэмнэлт гимнастикийн алтан медальт Алина Кабаеватай гэрлэсэн хэмээн бичиж байна. 31 насны зөрүүтэй хосын гэрлэх ёслол Оросын хойд хэсгийн Валдай хотын Валдай нуурын ойролцоо орших “Иверски” хийдэд нэлээд нууц хэмжээнд болсон хэмээн хэвлэлүүд бичжээ.

Кавказын улс төрч асан хуримын талаар анх твиттертээ бичсэнээр энэ мэдээлэл олны анхаарлыг татаж эхэлсэн байна. Түүний энэхүү жиргээг Оросын сөрөг хүчний томоохон төлөөлөл гэгдэж буй Алексей Навальный дахин жиргэсэн аж.

Харин шуугиант мэдээллийн талаар Ерөнхийлөгчийн хэвлэлийн албаны дарга Дмитрий Песков үгүйсгэжээ. Тэрээр “Известия” сонинд өгсөн ярилцлагадаа “Бид ийм төрлийн хов живийг олон удаа няцааж байсан. Гэсэн хэдий ч дахиад л гараад ирэх юм. Гэхдээ шуугиан дэгдээлээ гээд тэднийг тийм болгож чадах уу? В.Путин, А.Кабаева нар ямар ч холбоогүй хүмүүс” хэмээн хэлсэн байна.

Өнгөрсөн зургаадугаар сард В.Путин олон арван жил ханилсан эхнэр Людмилагаас салж буйгаа албан ёсоор зарласан юм. В.Путиныг уран гимнастикчтай олон жилийн турш дотно харилцаатай байгаа хэмээн холбон бичдэг ч Ерөнхийлөгчийн зүгээс энэ мэдээллийг хэзээ ч хүлээн зөвшөөрч байгаагүй юм. Харин тэднийг салалтаа зарласны дараа Алина Кабаева В.Путины хүүхдийг төрүүлэхийг хүсч байна хэмээн хэвлэлд ярьсан нь түүнийг ОХУ-ын тэргүүн хатагтай болох уу гэсэн шуугианыг дэгдээж байсан юм.

2008 онд “Московский корреспондент” сонин В.Путиныг А.Кабаеватай гэрлэх гэж байна хэмээн бичиж байсан юм. Тус мэдээллийг ч В.Путин үгүйсгэсэн бөгөөд сонин удалгүй хаагдсан билээ.