Сомалийн исламын цэргийн бүлэглэл Ал-Шабааб дахин их цус асгаруулсан халдлага үйлдэнэ хэмээн заналхийллээ. Энэхүү мэдэгдлийг бүлэглэлийн толгойлогч Ахмед Абди Годане хийсэн байна.

Ахмед Абди Годане дуу бичлэгээр хийсэн мэдэгдэлдээ Сомалид дайчлагдсан Кенийн цэргүүдийг эргүүлэн татахад хүргэх харгис халдлага үйлдэнэ хэмээн мэдэгдсэн байна. Тэрээр “Кенийн эрх баригчид Сомалигаас цэргээ татахгүй бол танай орны эдийн засгийн томоохон бүсэд дахин ийм халдлага болно” гэжээ.

Энэхүү заналхийллийг Кенийн эрх баригчид Ал-Шабаабын таван террористыг устгасан тухайгаа зарласны дараа хийжээ. Өнгөрсөн бямба гарагт тус бүлэглэлийн террористууд Кенийн нийслэл Найроби хотын Уэстгэйт их дэлгүүрт олон зуун хүнийг барьцаалсан юм. Харин Кенийн батлан хамгаалах хүчнийхэн дөрвөн өдрийн турш террористуудтай тэмцэж худалдааны төвийг чөлөөлсөн билээ. Энэхүү халдлагад 72 хүн амиа алдсаны 61 нь энгийн иргэн байжээ.

Кени улс 2011 оны 11 сард Ал-Шабааб бүлэглэлд эзлэгдсэн Сомалийн исламын бүс нутгийг чөлөөлөхөөр цэргүүдээ илгээсэн юм. Харин ийнхүү цэрэг илгээсний хариуд Кений худалдааны төвийг барьцаалсан хэмээн Ахмед Абди Годане хэлжээ.

Кени улс өчигдрөөс эхлэн орон даяар гурван өдрийн эмгэнэл зарласан билээ.