Монгол улсын Ерөнхий Прокурор, Төрийн Хууль Цаазын тэргүүн зөвлөх Д.Дорлигжав ахмадуудын өдрийг тохиолдуулан улс, аймаг, нийслэл, тээвэр, дүүргийн прокурорын газруудад ажиллаж байгаад гавьяаныхаа амралтанд гарсан ахмадуудаа хүлээн авч уулзан хүндэтгэл үзүүллээ.
    Нийслэлийн хэмжээнд прокурорын байгууллагад ажиллаж байгаад гавьяаныхаа амралтанд гарсан 80 гаруй ахмад прокурор ажилтнууд байгаа бөгөөд эдгээр хүмүүс прокурорын байгууллагад он удаан жил идэвхи зүтгэл гаргаж ажилласан манай ахмад үе юм.
    Уулзалтын үеэр Монгол Улсын Ерөнхий Прокурор, Төрийн Хууль Цаазын Тэргүүн Зөвлөх Д.Дорлигжав ахмадуудад прокурорын байгууллагад хийгдэж байгаа өөрчлөлт шинэчлэлийн талаар дэлгэрэнгүй танилцууллаа.
    Тэрээр хуулийн байгууллагын өөрчлөлт шинэчлэлтийн хүрээнд прокурорын байгууллага системийнхээ хэмжээнд харьяа прокурорын газруудын конторын барилгыг шинээр барьж засварлаж байгаагийн гадна байгаа, шуурхай ажлын авто машиныг шинэчилсэн, УЕПГ-т видео хурлын заал шинээр байгуулж харьяа прокурорын газруудтайгаа шууд харилцах боломж бүрдсэн, прокурорын газрууд комьпютерийн нэгдсэн сүлжээнд холбогдсон , УЕП-ын дэргэдэх Эрүүгийн хэргийн төв архивыг электрон архив болгон шинэчилж байгаа, Прокурорын сургалтын төвийг шинээр байгуулж байгаа, Сэлэнгэ аймгийн Мандал суманд прокурор ажилтнуудын амралт сувилалын цогцолбор байгуулж байгаа зэрэг арга хэмжээнүүдийг дэс дараатай авч хэрэгжүүлж байгаа талаар  танилцуулж мэдээллээ.
Ахмадуудыг хүлээн авч уулзан хүндэтгэл үзүүлэх ажиллагааны үеэр 70, 80, 90 настай золгож байгаа 9 ахмад прокурор ажилтнуудад мөнгөн аяга, алд цэнхэр хадаг өргөн барьж хүндэтгэл үзүүлж,  урт наслаж  удаан жаргахын ерөөл дэвшүүллээ. УЕПГ-т ажиллаж байсан Л.Дүгэрхүү, Б.Магсар, С.Дугуйцагаан, Г.Жаалдүү нар 70 нас, Ё.Цагаанхүү, Ч.Шийрэвдорж нар болон нийслэлийн прокурорын газарт ажиллаж байсан Г.Дулмаа, М.Адьяа нар  80 нас, С.Хүрлээ 90 настай золгож байгаа ажээ.
    Уулзалтын явцад прокурорын байгууллагад хийгдэх өөрчлөлт шинэчлэлийн хамгийн гол хэсэг нь үйл ажиллагаагаа явуулахад мөрдөж ажиллах хуулиуд бөгөөд тэдгээрийг олон улсын жишигт нийцүүлэн өөрчлөн шинэчлэх нь чухал ач холбогдолтой, энэ чиглэлээр эрчимтэй ажиллаж байна  гэж Монгол Улсын Ерөнхий Прокурор Д.Дорлигжав цохон тэмдэглэлээ.
Уулзалтанд оролцсон ахмад прокурор ажилтнууд өөрсдийн санал сэтгэгдэлээ илэрхийлж прокурорын байгууллагын цаашдын ажилд амжилт гаргаж ажиллахыг хүсэн ерөөлөө.