Сирийн сөрөг хүчнийхэн болон олон улсын байгууллагууд тус улсад өлсгөлөнгийн аюул нүүрлэсэн талаар мэдээллээ. Ялангуяа өнгөрсөн сард химийн зэвсэг ашиглан олон хүний амь үрэгдсэн Дамаск хотын захын хотуудад өлсгөлөн газар авч байгаа аж. 

Олон улс Сирийн химийн зэвсгийн асуудалд анхаарлаа хандуулж байх зуур буюу саяхны долоо хоногуудад зургаан хүн өлсгөлөнгөөр амиа алдсан байна. Үүний нэг нь 18 сартай охин байжээ. Охины ээжийн ярьснаар хоол олдохгүй байсны улмаас хөхөнд нь сүү орохгүй байсан тул охиндоо ургамал хандлан өгч байжээ.

“Save the Children” байгууллагын мэдээлснээр Сирийн дөрвөн сая иргэн идэх хангалттай хоолгүй амь зууж байгаа аж. Эдгээр хүмүүсийн тэн хагас нь хүүхдүүд байгааг мөн онцолсон байна. Хүнсний бүтээгдэхүүн хомсодсоны улмаас үнэ нь тэнгэрт хадсан нь олон хүн өлсөж үхэх шалтгаан болж байгаа гэлээ. 

НҮБ-ын Дэлхийн хүнсний хөтөлбөрийн захирал Эртарин Коусин хүчирхэг гүрнүүдийг Сирид зэвсэг нийлүүлэхийн оронд хүнсний тусламж үзүүлэхийг уриалсан байна. Тус хөтөлбөр Сирид гурван сая гаруй хүнийг хоолтой залгуулж байгаа юм.