Сүхбаатар дүүргийн X хорооны нутаг дэвсгэрт зам индүүдэгч машинаар хүн дайрч амь насыг нь хохироосон хэрэг 2009 онд гарч байсан.  Хайхрамж болгоомжгүйгээсээ болж нэг хүнийг замтай тэгшилсэн аймшигтай хэрэг шүүхээр хэрхэн шийдэгдсэн нь ч олонд нууц үлдсэн юм.

Хэргийг тодруулбал, Зуун айлын зам засварын ажил хийж байсан "World Arena" компанийн замын талбайн инженер Г.Наранбаатар, "Наран тойром" компанийн борооны ус зайлуулах шугамын инженер Г-г дайрч амь насыг нь хохироосон байдаг. Хүний аминд хүрсэн этгээдийн хувьд гуч гарч яваа, эхнэр хүүхэдгүй нэгэн байсан бол хохирогч Г  50 орчим насны эхнэр хүүхдийн хамт амьдардаг нэгэн байсан гэдэг.  Хохирогчийн хувьд төлөв даруу, хамт олон дундаа нэр хүндтэй, мэргэжлээрээ олон жил ажилласан туршлагатай хүн байсан аж.

Хэрэг гарсан өглөө хохирогч Г нь ээлжнээсээ буух байсан бөгөөд хохирогчийг индүүдэгч машинаар ухарч байхдаа дайрсан аж. Тухайн үед эл хэргийг санаандгүй, санаатай осол байсан гэх мэтээр хүн бүр л өөр өөрийнхөөрөө ярьж байв.

Харин замын ажилчид осол гарсан шалтгааныг тайлбарлахдаа "Бид замын ажлыг өдөр шөнөгүй хийж байна. Шөнөжин ажилласан ажилчид, инженерүүдийн хэн хэнийх нь ажиллах чадвар сулардаг юм. Осол гарсан өглөө ажилчдаа эрт амраагаад, инженерүүд ажлаа жаахан явуулъя гэж шийдсэн. Ингээд зам дээр гурван индүүний машин гаргасан юм. Хоёр нь нэг чигт, нэг нь эсрэг чигт зөрж индүүдлэг хийсэн. Эсрэг чигт индүүдлэг хийж байсан машины доогуур талийгаач санамсаргүй байдлаар орж осолдсон” гэж байв.

Зуун айлын зам засварын ажлыг хугацаанд нь дуусгаж амжихгүй байгаагаас шалтгаалан ажилчид хоёр ээлжээр ажиллаж байсан нь хэргийг гарахад нөлөөлсөн гэцгээдэг. Тэгэхээр замын ажилчид хэтэрхий ачаалалтай ажилласнаас осол болох шалтгааныг бүрдүүлээд байна уу даа. Ямартаа ч энэ хэргийг дахин сөхөхөд хүргэсэн нэгэн осол өнгөрсөн долоо хоногт гарсан байна.

Өөрөөр хэлбэл, дахин нэг зам засварын компани нь инженерээ замтай индүүдэж амь насыг нь хохироосон хэрэг гарчээ. Хэргийн тодруулбал, Хан-Уул дүүргийн хоёрдугаар хороонд “Монфрэш”-ын харалдаа урд замд зам засварын ажил хийж байсан компанийн ажилчин инженерээ замын индүүний машинаар дайрсан хэрэг гарчээ. Хохирогч залуугийн хувьд 23 настай замын инженер ажилтай залуу байжээ. Одоогоор хэргийн Хан-Уул дүүргийн цагдаагийн хэлтэс эрүүгийн хэрэг үүсгэн шалгаж байгаа аж. Тухайн компани аюулгүй ажиллагааны дүрэм зөрчсөн учир компанийн захиралыг сэжигтнээр татаж, инженерт нь эрүүгийн хэрэг үүсгэжээ.

Ихэвчлэн замын ачаалал багасахаар буюу шөнөөр ажлаа эхэлдэг зам засварынхан хөдөлмөрийн ажиллагааны аюулгүй байдлыг төдий л анхаарч чадахгүй байна уу?.  Ажилчин нь нойр дутуугаас анхаарал болгоомж муудсан уу. Замын гэрэлтүүлэг, аюулгүй ажиллагааны хэрэгслүүд хангалтгүй байна уу?. Ямартаа ч холбогдох газрууд нь зам засварын компаниудад шалгалт хийж хөдөлмөрийн аюулгүй ажиллагааны дүрмийг мөрдөж ажиллахыг сануулах нь зүйтэй болов уу?

Зам засварын компанийн хийж байгаа ажлаас болж эрдэнэт хүний амь нас хохирсоор байх уу?. Хаалт тавиагүй ухаад хаясан нүхэнд нь машинтайгаа онхолдсоор байх хэрэг үү?. Холбогдох газрууд нь анхааралдаа авч, нэгийг бодох цаг хэдийнэ болжээ. Замаа ч олигтой засч чадахгүй байж хүний аминд хүрээд байгаа нь байж боломгүй зүйл гэдгийг иргэд ч шүүмжилсээр байна.