Сүүлийн үед хуурамч мөнгөн дэвсгэрт үйлдэж, түүгээрээ банк санхүүгийн газраар үйлчлүүлэх тохиолдол ихэсч байгаа аж. Тиймээс цагдаагийн байгууллагаас бие бүрэлдэхүүн гарч хуурамч мөнгөн дэвсгэрт үйлдэж буй этгээд хийгээд хуурамч мөнгө гэдгийг нь мэдсээр байж ашиглаж борлуулсан хүмүүсийг яаралтай илрүүлэх ажиллагааг зохион байгуулж байгаа юм байна. Тэгвэл хүмүүс хуурамч мөнгө хийснээрээ, ашиглаж борлуулсанаараа ямар ял шийтгэл хүлээдэг болохыг ЦЕГ-ын хэвлэл мэдээллийн ахлах, цагдаагийн ахмад Ё.Лхагвасүрэнгээс тодрууллаа.

-Хуурамч мөнгөн тэмдэгт ашигласан мөн хуурамч мөнгө хийсэн иргэнд ямар хариуцлага тооцдог вэ?
-Хуурамч мөнгөн дэвсгэртийг хаана хэн хийж тараагаад байгааг илрүүлэхээр цагдаагийн байгууллагаас бие бүрэлдэхүүн гаргаж мөрдөн байцаалтыг хийж байгаа. Хуурамч мөнгөн дэвсгэрт үйлдсэн, хуурамч мөнгө гэдгийг мэдсээр байж гүйлгээнд оруулсан тохиолдолд эрүүгийн хуулийн 176.1-р зүйл заалтаар “Монгол Улсад төлбөр тооцооны хэрэгсэл болгон ашиглаж байгаа үндэсний болон гадаад улсын мөнгөн тэмдэгт, үнэт цаас, төлбөрийн бусад хэрэгсэл, онцгой албан татварын тэмдэгтийг хуурамчаар үйлдсэн, хуурамч гэдгийг нь мэдсээр байж ашиглаж борлуулсан бол хөдөлмөрийн хөлсний доод хэмжээг 51-250 дахин нэмэгдүүлсэнтэй тэнцэх хэмжээний төгрөгөөр торгох, 3-6 сараар баривчлах эсхүл 2-5 жилээр хорих ялаар шийтгэнэ.

-Хэрэв энэ хэргийн давтан хийж, бүлэглэж үйлдсэн бол авах шийтгэл нэмэгдэнэ биз дээ?
- Энэ хэргийг давтан буюу бүлэглэж урд нь энэ хэргээр шийтгүүлсэн этгээд үйлдсэн, түүнчлэн энэ хэргийн улмаас бусдад их хэмжээний хохирол учирсан бол тухайн этгээдийн эд хөрөнгийг хурааж, 5-10 жил хүртэлх хугацаагаар хорих ял онооно гэж хуулинд заасан байдаг. Хэрэв мөнгөн дэвсгэрт хуурамчаар үйлдсэнийхээ хэрээр хөрөнгөжсөн бол бүх хөрөнгийг нь хурааж улсын орлого болгодог.

-Сүүлийн үед хуурамч мөнгөөр гүйлгээ хийсэн хэдэн тохиолдол бүртгэгдээд байна?
-Сүүлийн үед 20 мянгатын хуурамч дэвсгэртээр гүйлгээ хийсэн  4-5 тохиолдол бүртгэгдээд байна. Тодруулбал, Сонгинохайрхан дүүргийн 15, Сүхбаатар дүүргийн 1, 3-р хороонд гурван удаа, Чингэлтэй дүүргийн 4-р хороонд нэг тохиолдлууд бүртгэгдсэнийг нь шалгаж байна.

-Хамгийн сүүлд хэзээ хуурамч мөнгөн тэмдэгдэгт илэрсэн бэ?
-Энэ сарын 26-ны өдөр Сонгинохайрхан дүүргийн “Сити шоп” хүнсний дэлгүүрт хуурамч 20 мянгатын дэвсгэртээр гүйлгээ хийсэн байна гэх хэргийг шалгахад СХД-ийн 15 дугаар хороонд оршин суух 58 настай эрэгтэй А гэгч нь хуурамч дэвсгэртээр гүйлгээ хийснийг нь илрүүлсэн. Одоогоор СХД-ийн цагдаагийн хоёрдугаар хэлтэс шалгаж байна.

-Хуурамч мөнгөн дэвсгэртээр дандаа 20 мянгатын дэвсгэрт л гарч ирж байгаа юу?
-Ихэвчлэн бүхэл мөнгө гарч ирдэг. Доод тал нь 20, 10, 5 мянгын дэвсгэрт гарч ирдэг.

- Хуурамч мөнгө ашиглаж байгаа иргэн чухам хаана борлуулах нь их байдаг вэ?
-Банкны гүйлгээнд хуурамч мөнгөн дэвсгэрт өгсөн байсан нь хэд хэдэн удаа бүртгэгдэж байсан. Мөн гэр хорооллын захын дэлгүүр хоршоо, халуун усны газар, үсчин гэх мэт газраар хуурамч мөнгөн дэвсгэрт ашиглаж үйлчлүүлэх тохиолдлууд гардаг.

Ямартаа ч иргэн та хуурамч мөнгөн дэвсгэрт үйлдэж, зарж борлуулж, ашигласнаараа эд хөрөнгөө хураалгаж, торгуулаад зогсохгүй, олон жилээр хоригдох ялаар ч шийтгүүлэх юм шүү. Нэг удаагийн тэнэг үйлдэл чинь насан туршийн алдааг дагуулах вий дээ гэдэг үүднээс энэхүү мэдээллээ хүргэж байна.