Буурай хөгжилтэй орнуудын эмэгтэйчүүдийн дунд дэлгэрээд байгаа тээгч эх болох "ажил" Энэтхэгт хүчээ авчээ. Энэ шинэ төрлийн бизнес Энэтхэгт жилд 1 тэрбум долларын орлого оруулдаг байна. Бүр зарим эхчүүд бусдын хүүхдийг төрүүлэхийн тулд есөн сар дотуур байранд амьдрах болжээ.

   Тухайлбал, Васанти гэх эмэгтэй хүүхэд гаргах боломжгүй болсон япон хосуудын хүүхдийг тээж, найман сар дотуур байранд амьдараад 8 мянган долларын хөлс авчээ. Хэрэв ихэр хүүхэд тээвэл 10 мянган доллар авдаг аж. Васанти найман сар тээсэн хүүхдээ төрүүлснийхээ дараа тавхан минут хараад япон хосуудад өгчээ. Гэсэн ч тэднээс авсан мөнгөөрөө өөрийн арван настай охиноо англи хэлний сургалттай сургуульд явуулах боломжтой болсон байна. Энэтхэгт тээгч эх болох нь хуулиар хориотой биш бөгөөд нэг эмэгтэй хамгийн дээд тал нь гурван удаа тээгч эх болохыг зөвшөөрдөг байна. Тэгээд ч бусад орныг бодвол хямд үнээр хүүхэд "үйлдвэрлэдэг". Дотуур байрны нэг өрөөнд гэхэд 10 тээгч эх байрладаг бөгөөд шаардлагатай амин дэм, витамин өгч, эмчилгээ хийдэг байна. Мөн биеэ зөв авч явах, хувцаслах гээд гоо зүйн сургалт ч явуулдаг аж. Ийм "дотуур байр" ажиллуулдаг эмч Пател "Миний энэ ажлыг хүмүүс их шүүмжилдэг, тээгч эх болсон эмэгтэйчүүдийг буруутгадаг. Гэхдээ хүүхэдгүй байхын зовлон амсч байгаа хосуудад тусалж байна. Нөгөө талаар энэ бол бие мах бодиороо хийж байгаа ариун хөдөлмөр" гэжээ.