“Жаст”-ын Ш.Батхүү гэгч дампуурсан бизнесменээс болж өмнө нь төрийн өндөр албан тушаалд данхалзаж явсан хэд хэдэн хүн хуулийнханд ээрэгдээд байна. Түүнийг Өмнөд Африкийн “Стандарт” банкнаас зээл авахдаа улсын “Эрдэнэт” үйлдвэрээс баталгаа гаргуулж авсан гэх хэргийг хуулийнхан шалгаж байгаа билээ. Ш.Батхүүг хуурамч гарын үсэг үйлдэж зээл авсан гэж үзэж байгаа. Харин тэрбээр “Тийм хуурамч гарын үсэг зурсан асуудал байхгүй” гэж сүр бараатай хэвлэлийн хурал хийхдээ олон нийтийг хуурч, өөрийгөө олон жилийн хөдөлмөр нь юу ч үгүй болсон өрөвдөлтэй хүн хэмээн харагдуулж чадсан. Гэсэн ч хуулийнхан түүнийг хуурамч гарын үсэг үйлдсэн гэж шалгасаар л байна.

Энэ хэрэгт нэлээн хэдэн хүний нэр холбогдсоны нэг нь   «УБТЗ»-ын дарга асан Т.Очирхүү юм. Тэрбээр Ш.Батхүүгийн батлан даагч болж Өмнөд Африкийн «Стандарт» банкнаас 34 сая ам. долларын зээл авч өгсөн гэх яриа байдаг ч тэрбээр энэхүү мэдээллийг эрс үгүйсгэж байсан.
 
Тэгвэл өнгөрсөн сард манай улсын криминалистик шинжилгээгээр түүний гарын үсэг мөн гэдгийг тогтоосон байна. Гэтэл тэрбээр одоо ч мэлзсээр байгаа юм. Тус банкны зүгээс манай улсад ирж холбогдох албаны хүмүүстэй зөвшилцсөний эцэст манайхаас ажлын хэсэг гаран нэг сарын өмнө тус улсыг зориод ирсэн аж. Гэхдээ одоогоор ажлын хэсэг энэ хэргийн талаар хэрхэн яаж ярилцсан эсэх нь нууц байгаа юм.