“Чингис хаан” олон улсын нисэх буудлаас өчигдөр 12.40 цагт Төв аймгийн чиглэлд ниссэн “Ми-8” нисдэг тэрэг сураггүй болоод байсан юм. Энэхүү нисдэг тэрэг Багануур орчимд осолдсон талаар бид мэдээлсэн. Осолдсон “Ми-8” нисдэг тэрэгт нисгэгчидтэй нийлээд загас барихаар явж байсан зургаан том хүн нэг хүүхэд байжээ. Тэгвэл ИНЕГ-ыхан ЕС-145  нисдэг тэргээр ослын газарт ажиллаж байгаа юм.

Энэ талаар албаныхан ямар нэгэн тодорхой тайлбар хийхээс татгалзаж байсан төдийгүй онцгой байдлын газарт ч ийм мэдээлэл ирээгүй гэж байв.

Гэвч бол Зам тээврийн сайд А.Гансүх өөрийн твиттер хуудсаараа дамжуулан  “А-жет” компанийн нисдэг тэрэгтэй холбоотой ослыг газар дээр нь шалгаж байна. Тус компани өөрийн өмчлөлийн нисдэг тэргээр нислэг хийж, газардах үедээ налж унасан байна. Зорчиж явсан долоон хүн гэмтээгүй. Осолдсон  нисдэг тэрэгний хувьд  нислэгийн шаардлага хангасан, зөвшөөрөлтэй байсан. Өөрөөр хэлбэл, актлагдсан гэдэг ташаа мэдээлэл” хэмээн албан ёсоор мэдэгдлээ.

Мөн  ослын урьдчилсан дүгнэлт гарчээ. Тодруулбал, “А-жет”-ийн нисдэг тэрэг голын эрэгт буугаад салхинд цохиулсан байна. Ингээд буулт хийх сүүлчийн шатандаа салхины нөлөөнд орж хүчтэй газардсанаас даах сэнс хугарсан аж.

Одоогоор нисэгчдийг Улаанбаатар хотод авч ирсэн ба загас барихаар явсан хүмүүс ямар нэг гэмтэл шарх аваагүй учир загасаа барихаар үлдсэн байна.