Дэлхий нийтийн халуун цэг болоод байгаа Сири улс дахь мөргөлдөөн газар авсаар байна. Төв Сирийн Хама хотын захад амиа золиослогч этгээд машинд бөмбөг дэлбэлсний уршгаар 30 гаруй хүн амиа алджээ. Сана хотын хэвлэлээр амиа золиослогч этгээд, төрийн байгууллагын шалгах цэгийг дэлбэлэх зорилготой байсан гэж тайлбарлаж байна.



Гэтэл Их Британи улсаас Сирийн дайныг ажиглаж байгаа хүний эрхийн байгууллага “Аль-Кайда” бүлэглэлтэй холбоотой халдлага боллоо гэж үзэж байгаа ажээ. Ажиглагчдын дүгнэж байгаагаар уг машинд бөмбөг тавьж, Сирийн Засгийн Газрын эрх мэдэлтүүдийг хөнөөхөөр төлөвлөж байсан ч, энгийн иргэд золиос болсон гэнэ. Дээрх халдлагаас амьд үлдсэн нэгэн иргэн “Гэм зэмгүй хүмүүс золиос болох ёсгүй. Энэ бол хүнлэг биш зүйл. Эдгээр террористууд энэ улсад байх ёсгүй” хэмээн өгүүлсэн байна. 2011 оны гуравдугаар сараас эхэлсэн Сирийн иргэний дайн газар авч эхэлсэн цагаас Хама хотынхон ерөнхийлөгч Башар Ал-Ассадын дэглэмийг хүчтэй эсэргүүцэж байсан юм. Гэвч 2011 оны сүүлчээр хамгаалалтын ажилчтнууд хотыг хүчээр эзэлсэнээс хойш хяналтаа алдаад байгаа гэнэ. Хама бол орчин үеийн Сирийн түүхэн дэх чухал газруудын нэг бөгөөд Башар Ассадын эцэг ерөнхийлөгч агсан Хафез Ал-Ассад, Лалын ахан дүүс байгууллагын эсэргүүцлийг дарахын тулд дайчдыг Хама руу илгээж байжээ. Арабын холбоо ирэх сарын 23-н гэхэд Сирийн асуудлаар бага хурал зохион байгуулахаар төлөвлөжээ.