Саяхан Бээжингийн эрх баригчид дэлхийн өнцөг булан бүрт байх амьтны хүрээлэнгүүдэд 50 орчим хулсны баавгайг зээлдүүлсэн юм. Эдгээр амьтдыг бусад амьтны хүрээлэнд аваачсанаар тоо толгойг нь өсгөхийг зорьж байгаа гэж Хятадууд тайлбарлаж байгаа. Гэтэл ингэж зээлдэх нь Хятадын экспортын хэлэлцээр хийх гол арга гэж үзэж байна. Ялангуяа Бээжин хот ураныхаа хэрэглээг нэмэгдүүлж, цөмийн реакторуудаа хүчтэй болгох шаардлагатай. Тиймээс Хятадууд хулсны баавгайг ашиглан чөлөөт худалдааны гэрээ хийхийг эрмэлзэх болжээ.

Хэдийгээр Хятадууд баавгайг үнэ төлбөргүй  аваачихыг зөвшөөрдөг ч энэ нь амьтны хүрээлэнг хөгжүүлэхийн тулд биш гэнэ. Байгалийн баялаг болоод технологийн асар их нөөц баялагтай энэ оронд хулсны баавгай зээлдүүлэх нь бусад орны итгэлийг олж, худалдааны таатай байдлыг бий болгох гэсэн алсын бодлого байж мэдэх юм. Энэ таамаглалыг Оксфордын их сургуулийн судалгааны багийнхан дэвшүүлжээ. 2011 онд Хятад улс Шотландаас яргай загас, нефть химийн бүтээгдэхүүн импортлох олон тэрбумын долларын гэрээ байгуулсан. Одоо Эдинбургын амьтны хүрээлэнд хулсны баавгай бэлэглэжээ. Мөн Канад, Австрали, Франц зэрэг ураны нөөцтэй орнуудад хулсны баавгайгаа зээлдүүлж байгаа гэнэ.