Ноцтой осол гарч дөрвөн хүн газар дээрээ нас баржээ. Тодруулбал, энэ сарын 19-нд Налайх дүүргийн 5-р хороонд Городокийн зам дээр "Toyota Land Cruiser", "Hyundai Sonata-3" автомашинууд мөргөлдөж, 01-ээс 62 насны  дөрвөн хүн нас барсан байна. Хэргийг Налайх дүүргийн цагдаагийн хэлтэс шалгаж байгаа аж.
Хэргийн талаар Нийслэлийн онцгой байдлын хэвлэл мэдээллийн ажилтан Р.Бурмаагаас тодрууллаа.

-Дөрвөн хүний амь нас хохирсон ноцтой осол гарсан гэсэн. Энэ талаар?
-Налайх дүүргийн 5 дугаар хороо, Гордокын баруун талд /автозамын босоо тэнхлэгийн 39 дүгээр багана/ автозам дээр зам тээврийн осол болж хүн автомашин дотроо хавчуулагдсан байна гэсэн дуудлагыг 13:12 цагт дуудлага өгснөөр нийслэлийн Налайх дүүргийн Онцгой байдлын хэлтсийн Аврах, гал унтраах 28 дугаар ангийн тасгийг гаргасан. Ингэхэд “Соната-3” загварын суудлын автомашин, “Ланд крузер-100” загварын автомашинтай мөргөлдсөний улмаас “Соната-3” автомашины дотор зорчиж явсан иргэн 60 гаруй настай эмэгтэй автомашины төмөр хийцэд хавчуулагдсаныг гаргаж эмнэлгийн анхны тусламж үзүүлэн, дүүргийн Эрүүл мэндийн нэгдэлийн түргэн тусламжийн эмчид шилжүүлсэн.

-Өөр хэчнээн хүн бэртсэн бэ?
-44 настай эмэгтэй, 32 настай эмэгтэй, 12 настай эмэгтэй, 8 настай эмэгтэй, овог нэр, хаяг нь тодорхойгүй 1 хүүхдийг ГССҮТ-т хүргэсэн. Дээрх ослын улмаас 4 хүн нас барж, 5 хүн гэмтсэн.

Автомашины төмөр хийцэд хавчуулагдан нас барсан 56 настай эрэгтэйн цогцсыг гаргаж дүүргийн Цагдаагийн хэлтсийн жижүүрийн  бүрэлдэхүүнд шилжүүлэн өгсөн. Харин ослын газраас дүүргийн эмнэлэг рүү тээвэрлэгдэн явах үед 49 настай, эмэгтэй, 60 гаруй настай эмэгтэй, нэг настай, эрэгтэй нар нас барсан байна.