Баянзүрх дүүргийн Онцгой байдлын хэлтсийн Аврах, гал унтраах 63 дугаар ангийн аврагчид 21 хүнийг галын аюулаас аварчээ. Тодруулбал, энэ сарын 18-ны 14.11 цагт “Да хүрээ” захын ойролцоох нийтийн байранд гал гарсан байна. Тус байр нь Баянзүрх дүүргийн XXIV хороо “Хоршооллын” хоёр тоотод байрлах 10 айлын нийтийн байр байжээ. Гал гарлаа гэх дуудлагыг иргэн Ж.Баярмаа өгсөн байна. Энэхүү дуудлагын дагуу 63 дугаар ангийн салааны захирагч, дэслэгч Б.Өлзийсайханаар ахлуулсан II салаа очиж ажиллажээ. Аврагчдыг очиход, тус байрны коридор, тааз болон цахилгааны утас шатаж байсан ажээ. Аврагчид 45 минутын хугацаанд тэнд ажиллаж галыг унтраасан байна. Энэ хооронд шатаж байсан байрнаас10 айлын 21 иргэнийг гаргаж, амь насыг нь аварчээ. Байрны түрээслэгчид ажилдаа явсан байсан учраас нийтийн байранд нялх хүүхдүүдийг харж үлдсэн ахмадууд л байсан гэнэ. Одоогоор нийслэлийн Онцгой байдлын газрын жижүүрийн байцаагч, дэд хурандаа Д.Ганболд, Баянзүрх дүүргийн цагдаагийн I хэлтсийн, дэслэгч Ц.Отгоннямаар ахлуулсан бүрэлдэх үүн галын шалтгаан нөхцөлийг тогтоохоор ажиллаж байгаа юм байна. Нийтийн байр бүрэн шатаж дууссан талаар Нийслэлийн онцгой байдлын газраас мэдээллээ.
