АНУ-ын тагнуулын албаны ажилтан байсан Эдуард Сноуден тагнуулын албаны хууль бус үйл ажиллагааг дэлхий нийтэд дэлгэж, шуугиан тариад байсан. Тэгвэл АНУ-ын тагнуулын ажиллагаа Францад хүртэл үргэлжилж, жирийн иргэдийн утасны дуудлагыг бичиж авч байсан нь илэрлээ. Францын иргэдийн хувийн мэдээлэлд халдсан энэхүү ажиллагаа нь тус улсын эрх баригчдын дургүйцлийг төрүүлжээ. Тиймээс АНУ-ын ерөнхийлөгч Барак Обама, төрийн нарийн бичгийн дарга Жон Керри нар Цагаан ордонд Францын ерөнхийлөгч Франсуа Олландтай уулзаж, дээрх асуудлаар ярилцсан байна.




АНУ-ын төрийн нарийн бичгийн дарга Жон Керри “Франц улс бол манай хамгийн ойрын түнш” хэмээн тал засчээ. Харин ерөнхийлөгч Франсуа Олланд, хэдийгээр дээрх үйл ажиллагааг улс төр, бизнесийн болон террорист гэмт хэргийг илрүүлэх зорилгоор явуулсан ч сайшаахгүй байгаа гэдгээ илэрхийлжээ. Тэрээр уг үйл ажиллагааг иргэдийн нууцад халдсан хууль бус явдал гэж үзэж байгаагаа хэвлэлүүдээр илэрхийлсэн байна. АНУ-ын талаас дээрх тагнуулын ажиллагааг явуулахдаа иргэдийн мэдээллийг задраахгүй байх үүднээс хуулийн дагуу хамгаалж байсан гэж тайлбарлалаа. АНУ, өнгөрсөн оны 12-р сараас 2013 оны нэгдүгээр сарын 8-н хүртэлх 30 хоногийн хугацаанд Францын 70 гаруй сая гар утасны дуудлагыг чагнажээ.