“Нарантуул ” захад өнгөрсөн наймдугаар сард гал гарч хүнсний зах тэр чигээрээ шатсан.  Энэхүү гал түймрээс болж хүний амь нас хохирч олон зуун хүмүүс ажлын байраа алдаж их хэмжээний хохирол учирсан. Тэгвэл галын дүгнэлт болоод хохирлын хэмжээг албаныхан өчигдөр гаргасан талаарх мэдээллүүд цацагдах боллоо. Тэгвэл хоёр сар гаруй мөрдөн байцаалтын ажиллагаа явагдсан уг галын дүгнэлтийн талаар  ЦЕГ-ын хэвлэл мэдээллийн ажилтан, цагдаагийн ахмад Н.Төгсбаяраас тодрууллаа.

-“Нарантуул” захын шатсан шалтгаан гарсан гэх мэдээлэл гарсан гэдэг үнэн үү?
-“Тухайн  хүнсний зах доторх цайны газарт байх цахилгаан дамжуулах сүлжээнд шилжилтийн эсэргүүцэл үүссэний улмаас гал гарсан  гэсэн шалтгаан нөхцлийг  тогтоосон байгаа.

-Хэчнээн  түрээслэгчид хохирсон болох нь тогтоогдсон бэ?
-Одоогоор тухайн галын хэрэг дээр 420 гаруй хүмүүсийг цагдаагийн байгууллагын зүгээс хохирогчоор тогтоон шалгаж, тайлбар мэдээлэл авсан байдалтай байгаа.

-Хохирлын хэмжээ 16 орчим тэрбум болсон гэсэн мэдээлэл гараад байна?
 -Хохирлын хэмжээ нийтдээ  16 орчим тэрбум төгрөгөөр  хохирсон болох нь тогтоогдож харин мөрдөн байцаалтын явцад 6 орчим тэрбум төгрөгийг нөхөн төлүүлсэн байдалтай байгаа.

-Энэ хэрэгт сэжиглэн шалгаад байсан хүмүүсийн хувьд?
-Энэ хэрэгт албан тушаал болоод ажил үүргээ сайн биелүүлээгүй гэдгээр  12 иргэнийг  сэжигтнээр татан  шалгасан.  Удахгүй цагдаагийн байгууллагаас хүнсний захын хохирлыг хэмжээ болоод тухайн хэргийн газарт ажилласан ажилтан, албан хаагчид мөн төрийн болон төрийн бус байгууллагын албан хаагчдын төлбөрийн хэмжээг тооцох түүнчлэн хохирлыг хэмжээг нэгтгэн дүгнэсний үндсэн дээр  Прокурорын байгууллагад шилжүүлнэ.

Ямартаа ч гал цайны газрын цахилгааны саатлаар үүссэн гэж тогтоогдож байгаа ч “Нарантуул”-ын түрээслэгчид болоод удирдлагууд нь хүлээн зөвшөөрөхгүй байна. Учир нь тэд гадны нөлөөтэй гэдэгт 100 хувь итгэлтэй байгаа юм.