УИХ-ын гишүүн Н.Номтойбаяр хэвлэлийн хурал хийлээ. Тэрбээр хамгаалагчаар нь ажиллаж байсан Б.Батзоригийн талаар болоод цагдаагийн газарт гомдол гаргаад байгаа Г.Нямдоржийн талаар мэдээлэл хийлээ. Н.Номтойбаярын ярьж буйгаар бие хамгаалагч нь байсан Б.Батзориг нь Н.Номтойбаярын нэр хүндийг унагаах зорилгоор тус тойрогт нэр дэвшиж байсан УИХ-ын гишүүн асан Ц.Шинэбаяртай тохиролцоонд хүрч улмаар сонгуулийн үеэр мэдэгдэл хийсэн байна. Тэд 100 сая төгрөгийн мөнгөн тохироо хийсэн боловч Ц.Шинэбаяр хэлсэндээ хүрэлгүй мянган ам.доллар Б.Батзоригт өгчээ. Тэгвэл Н.Номтойбаяр гишүүн энэ Ц.Шинэбаяртай хийсэн тохирооныхоо талаар Б.Батзориг нь иргэн Б-тэй ярилцаж байгаа бичлэгийг хадгалж байгаа аж. Иймд тэрбээр энэхүү бичлэгийг холбогдох байгууллагад өгч, шалгуулахаар болсон байна. Мөн тэрбээр энэхүү явуулгын цаана нь УИХ-ын гурван гишүүн, Засгийн газрын нэг гишүүн болон нэр бүхий хоёр бизнесмэн байгаа нь урьдчилсан байдлаар илэрсэн гэв.

Б.Батзоригийн хувьд өдгөө гадаадад байгаа бөгөөд хамгийн сүүлд аав нь ор сураггүй алга болсон гэх мэдээлэл байгаа юм.