Онлайнаар бусдыг дарамталсан хэрэг дахин гарч шуугиан тарьсан. Тэгвэл энэ талаар ЦЕГ-ын хэвлэл мэдээллийн төвийн байцаагч, цагдаагийн ахмад Н.Төгсбаяраас тодрууллаа.

-Цахим ертөнцөд гэмт хэрэг үйлдсэн тохиолдол дахин гарсан байна. Энэ талаар?

-Фэйсбүүк хаягаар охид эмэгтэйчүүдийг модель болгоно, агентлагт зуучилна гэх зэргээр зургийг нь авч, мөнгө нэхэмжилсэн үйлдлийг шалгаж байна. Оюутан залуус, охид бүсгүйчүүд цахим хуудсаар танихгүй хүнтэй харьцсанаасаа болж гэмт хэрэгт холбогдох, хохирогч болох тохиолдол байна.

-Өмнө ч ийм байдлаар иргэдийг хуурч байсан хэрэг гарсан. Энэ удаагийн хэргийн холбогдогчийг тогтоосон уу?

-Сэжигтнүүдийг саатуулан шалгаж байгаа. Холбогдсон охидоос мэдүүлэг авч эхэлсэн. Өмнө нь “зар.мн” зэрэг  хуурамч худалдааны цахим хуудас ажиллуулж, хямд үнээр бусдад эд хөрөнгө зарна гэх мэтээр мөнгө төгрөгийг нь залилж авдаг байсан хэрэг гарч байсан. Үүнийг тухайн үед нь цагдаагийн байгууллагаас шалгаж, тогтоосон. Мөн охид залуус гадны иргэдтэй өөрсдөө танилцаж, зураг, бичлэгээ өгчихдөг. Түүнийг нь гэмт хэрэгтнүүд ажиглаж олон нийтийн сайтад тавина хэмээн дарамталж мөнгө нэхдэг,  хямд бараа худалдаж авах нэрийдлээр гадаад руу олон улсын банкаар гүйлгээ хийж мөнгөө алддаг тохиолдлууд гарч байсан.